Dy ditë para zgjedhjeve, Gazment Bardhi mbledh Këshillin Kombëtar

25 Korrik 2023, 12:28, Politikë CNA

PD e vulës është katandisur si mos më keq. Ndërsa e ndajnë vetëm 4 ditë nga zgjedhjet për kreun e ri, duket se përplasjet mes tyre nuk kanë të sosur.

Pasi i rrëmbyen vulën, sekretari i Përgjithshëm, Gazment Bardhi ka thirrur në mbledhje Këshillin Kombëtar.

Mbledhja do të mbahet ditën e enjte në orën 19:00 online. Një ditë më parë 7 deputetë i kërkuan Bardhit të ushtrojë kompetencat që i cakton statuti.

Ky i fundit pranoi kërkesën duke bërë me dije se shumë shpejt do të thërriste mbledhjen e Këshillit Kombëtar.

7 deputetët në kërkesën e tyre kundërshtonin zgjedhjet e 29 korrikut.

Në letrën drejtuar Bardhit, 7 deputetët, Lefter Gështenja, Bledion Nallbati, Ramadan Likaj, Dashnor Sula, Xhelal Mziu, Helidon Bushati dhe Saimir Korreshi shprehen se thellimi i përçarjes e dëmton në mënyrë përfundimtare PD dhe se forcimi i partisë është i vetmi objektiv që duhet t’i bëjë bashkë të gjithë.

Ata theksojnë se, shumica dërrmuese e anëtarëve të PD janë të lodhur nga konflikti i brendshëm dhe kërkojnë zgjidhje nga përfaqësuesit e tyre, për shkak se përçarja po forcon regjimin e korruptuar të Edi Ramës;

Duek patur parasysh këto fakte ata kanë ndërmarrë iniciativën për të kontaktuar individualisht dhe vlerësuar vullnetin e secilit anëtar legjitim të Këshillit Kombëtar, si organi më i lart drejtues i partisë në periudhën mes dy Kuvendeve.

Më tej shkruhet se nga kontakti dhe vlerësimi i vullnetit të anëtarëve të Këshillit Kombëtar sipas listës së anëtarësisë së Këshillit Kombëtar të PD të depozituar dhe regjistruar në Zyrën e Regjistrit të Partive Politike pranë Gjykatës së Shkallës së Parë Tiranë dhe të konfirmuar zyrtarish nga organet përgjegjëse statutore, rezultoi se 276 anëtarë të Këshillit Kombëtar nga 453 anëtarë gjithsej në detyrë, një pjesë prej tyre ishin përjashtuar pa vendim nga mbledhja e Këshillit Kombëtar, ishin njohur por nuk kishin marrë pjesë në mbledhje ose ishin në mbledhje por nuk e konsideronin atë legjitime, duke mos qenë dakort me “vendimmarrjet pa kuorum”.

Ndërsa nuk vonoi shumë dhe më pas u zbardh dokumenti i cili tregonte se grupi i Bashës i hiqte vulën Bardhit.