"Dridhni zinxhirin dhe shpërdoroni"/ Rama-Dredhës: Situata me ujin në Vlorë e papranueshme

3 Shtator 2025, 11:20, Politikë CNA

"Dridhni zinxhirin dhe shpërdoroni"/ Rama-Dredhës: Situata

Kryeministri Edi Rama, i pranishëm në tryezën e prezantimit të krijimit të Operatorit të Ujit, ka kritikuar ashpër pushtetin vendor dhe shoqëritë rajonale të këtij sektori për keqmenaxhim të fondeve dhe zhytjen në borxhe.

Rama ka kritikuar ashpër kryetarin e Bashkisë së Vlorës, Ermal Dredha, duke i sjellë në kujtesë mungesën e furnizimit me ujë gjatë sezonit veror në këtë bashki duke e konsideruar si situatë të papranueshme.

Kryeministri akuzoi administratat lokale se shpërdorojnë fondet dhe "dredhin zinxhirin". Rama tha se sipas raportit entet e ujit kishin një borxh prej 13.6 miliardë eurosh në OSHEE.

"Niveli i paaftësisë në pushtetin vendor është i frikshëm. Vlora e nisi sezonin turistik me një situatë të papranueshme për furnizimin me ujë.

Nuk bëmë investime, por vetëm komanduam një ekip nga Tirana dhe me vëmendje të posaçme nga ministria këtu për ta administruar. Me ato që gjendeshin solli një përmirësim dhe hoqi ankthin e alarmin se s’kemi ujë. Si mund të ndodhë kjo?

Raporti i bërë nga ai ekip për administrimin e Ujësjellësit të Vlorës tregon papërgjegjshmëri të frikshme.

Borxhet e akumuluara nga këto ndërmarrje ishin 13.6 miliardë euro. Harxho, shpërdoro dhe dridh zinxhirin dhe ngarko OSHEE-në me borxhe", tha kryeministri duke kritikuar administratat lokale për keqmenaxhimin e ujit.

Rama bëri një raport të implementimit të reformës për furnizimin me ujë ku tha se janë shkrirë shoqëritë rajonale nga 15 në 9 për të ulur borxhin. Për fazën e dytë paralajmëroi masa ndaj abuzuesve që në këtë rast, tha ai, ndryshe nga energjia, shkelës janë bizneset, jo qytetarët.

"Ngritëm 58 çeta, 15 shoqëri rajonale me qëllim përmirësimin e situatës. Sot kemi rezultate domethënëse që tregon se përgjigjja është bashkimi dhe jo copëzimi. Njerëzit nuk pijnë decentralizimin në rubineta, por ujë. Sot kemi 9 shoqëri rajonale nga 15 që sot nuk krijojnë detyrime ndaj OSHEE-së.

Uji në qiell është diçka tjetër, në çezma është mall që grumbullohet, shitet dhe blihet, është mall jetik.

Prandaj nisim këtë fazë të dytë të reformës. 100 mijë përdorues të rinj janë lidhur në rrjet nga faza e parë e janë prerë lidhjet e paligjshme.

Njësoj siç kemi bërë me energjinë do të ndërhyjmë me një plan masash. Jemi në kushtet ku abuzuesit janë për motive fitimi, lavazhet, ujë që derdhet në pikat kombëtare, lidhje të paligjshme nën tokë që do të jenë target i masave.

Kjo është koha për të nisur punën për heqjen e depozitave që janë kthyer në pesha të pallateve dhe mund të bëhen burim katastrofash. Heqja e depozitave përmirëson furnizimin. Jemi të përkushtuar dhe kemi shumë pika të kuqe për t’i kthyer në jeshile për investime për t’i futur në botën e re të teknologjisë.

Hyrja në BE kërkon një krahasueshmëri të konsiderueshme në furnizimin me ujë deri në 2030", tha Rama