Dorian Teliti: Tallje, Rama kërkonte arsye të rreme për të mos rritur pensionet

22 Tetor 2024, 10:43, Politikë CNA

Dorian Teliti: Tallje, Rama kërkonte arsye të rreme për të

Këshilltari për çështjet ekonomike në PD, Dorian Teliti

Deklarata e këshilltarit për çështjet ekonomike në PD, Dorian Teliti, ka folur për skemën e pensioneve që u prezantua ditën e djeshme nga Kryeministi Edi Rama dhe nga ministrat e Ekonomisë e të Financës.

Sipas Telitit, Rama e ministrat e tij u tallën me pensionistët, fliste për arsyet e rreme të mosrritjes sa duhet të pensioneve, dhe për deficitin e skemës së pensioneve.

“Pamë se si Kryeministri, ministrat dhe zëdhënësit e tij zyrtarë ose jo, mundoheshin të justifikoheshin para shqiptarëve dhe sidomos pensionistëve të harruar prej tyre.

Pamë sot se si kreu i qeverise dhe stafi i tij na flisnin për arsyet e rreme të mosrritjes sa duhet të pensioneve, dhe për deficitin e skemës së pensioneve. 11 vite më parë ishte i njëjti Kryeministër që na shiste si mrekulli reformën e re të pensioneve, që sipas tij do zgjidhte njëherë e përgjithmonë problemet e pensionistëve. Sot është i gjithëpranuar dështimi i saj nga çdo aktor i tregut, dhe nga pensionistet vetë, dështim të cilin ne e paralajmëruam.”

Teliti i bëri thirrje Kryeministrit Edi Rama se duhet të dalë para pensionistëve dhe të kërkojë falje, pasi në 11 vite të qeverisjes së tij, penisonet i ka rritur në më pak se 30%.

Duke e krahasuar vendin tonë me Kosovën, Teliti tha se ndryshe nga ne ato i rritën pensionet 5 herë më shumë, ndërsa Rama sipas tij është tallur duke u dhënë 25-lekëshin ditor.

“Ju sot duhej të dilnit para pensionistëve dhe të kërkonit të falur, pasi në këto 11 vite të qeverisjes suaj, ndonëse çmimet janë rritur me nga 2-3 herë, pensionet janë rritur me pak se 30%. Jeni ju që pak javë më parë u tallet me 790 mijë pensionistë duke u dhënë 25-lekëshin ditor, ndërkohë që Kosova fqinje, me një qeverisje serioze i rriti pensionet 5 herë më shumë. Ishit ju që vendosët të rrisnit kostot e ilaçeve të pensionistëve, duke futur në tregun vendas ilaçe jocilësore, të cilat përkthehen në barrë shtesë për pensionistët. Ishit dhe jeni ju që çdo vit ndryshoni listën e barnave të rimbursueshme, duke shkaktuar që rreth 60% e faturës shëndetësore të paguhet nga xhepi i pensionistëve. Ishit ju që rritët kostot e energjisë elektrike për pensionistët, duke u treguar atyre gishtin drejt batanijes për t'u ngrohur në ditët e ftohta të dimrit. Ishit ju që rritet, si kostot e furnizimit me ujë anembanë Shqipërisë dhe kostot e transportit urban.

Ishit ju z. Kryeministër që rritët taksat, tatimet dhe tarifat në kurriz të shqiptarëve dhe pensionistëve, ndërkohë që paratë i dërguat në llogaritë e tenderimeve pa garë, lukseve qeveritare, koncesioneve të pakërkuara klienteliste e korruptive dhe “rrugëve të florinjta”. Jeni ju që mbyllni sytë para shifrave të Eurostat sipas të cilave 46% e shqiptarëve, kryesisht pensionistë, janë të zhytur në varfëri.”

Nga ana tjetër, Dorian Teliti premtoi se rritja reale e pensioneve me objektiv dyfishimin e tyre brenda mandatit të parë qeverisës, është angazhim madhor i Partisë Demokratike.

Po ashtu ai i bëri thirrje Ramës që të heqë dorë nga propaganda dhe nga gënjeshtrat.

“Hiqni dorë nga propaganda dhe gënjeshtrat! Vendosja e minimumit jetik prej 220 eurosh është sot një domosdoshmëri kombëtare në luftën tonë të përbashkët ndaj varfërisë. Rritja reale dhe serioze e pensioneve me objektiv dyfishimin e tyre brenda mandatit të parë qeverisës, është angazhim madhor i Partisë Demokratike. Shqipëria i ka burimet dhe buxheti i shtetit i ka të gjitha mundësitë financiare për ta fituar betejën me kafshatën e gojës, mjafton të largojmë abuzuesit e taksave tuaja nga karriget qeveritare.”/CNA