E fundit!

19:39 Aktualitet

"Rama jepe dorëheqjen"/ Diaspora proteston në Bruksel

Diaspora po zhvillon sot një protestë përballë godinës së ...

"Do të sjellim dokumente dhe materiale" / Berisha në KiE: Rreziku më i madh për shqiptarët është droga

1 Tetor 2025, 13:49, Politikë CNA

"Do të sjellim dokumente dhe materiale" / Berisha në KiE:

Kryetari i Partisë Demokratike, Sali Berisha, në fjalën e tij para grupit të PPE në Asamblenë Parlamentare të Këshillit të Europës në Strasburg, deklaroi se rreziku më i madh për shqiptarët është droga dhe shndërrimi i vendit në një shtet narkotik.

Berisha tha se ky është një rrezik më i madh se Rusia. Ai u tha të pranishmëve se po i informon me dokumente dhe materiale mbi takimin e kryeministrit Edi Rama në Aruba me përfaqësues të karteleve të drogës.

Kryedemokrati tha se qëllimi i takimit ishte ftesa për ta për të investuar në Shqipëri në fushën e ndërtimit.

Në denoncimin e tij Berisha tha se vetë kryeministri dhe ministri i Jashtëm u kanë bërë presion ndërkombëtarëve për raportin e zgjedhjeve.

"Miqtë folën për kërcënime të ndryshme, kërcënimin rus, kërcënimin tjetër, kërcënimin tjetër. Për shqiptarët, kërcënimi më i madh ekzistencial është droga. E vërteta është se ne do t’ju informojmë ju, kolegë të nderuar, me dokumente dhe materiale, por çfarë ka dalë? Ka dalë nga antimafia italiane që përfaqësues të qeverisë shqiptare kanë bërë një takim në Aruba me kartelet më të larta të drogës.

Cili ishte qëllimi i takimit? Qëllimi ishte një marrëveshje për të investuar paratë e tyre në Shqipëri. Por kushdo që vjen në Shqipëri ose sheh të dhënat e Eurostat-it, do të gjejë që indeksi i ndërtimit në Shqipëri është tri herë më i lartë se mesatarja për Bashkimin Europian. Ndërkohë që industria, bujqësia po bien, janë në recesion.

Dhe ende raporti ndërkombëtar për zgjedhjet nuk ka dalë. Vetë Kryeministri dhe ministri i Jashtëm janë të përfshirë drejtpërdrejt në ushtrimin e presionit mbi vëzhguesit ndërkombëtarë për të ndryshuar raportin e parë paraprak," tha kryedemokrati.

Berisha deklaroi se kartelet shqiptare përcaktojnë çmimin e kokainës. Kreu i PD-së iu referua qeverisë si narkoshtet dhe tha se është kthyer në rrezik për vendin, për rajonin dhe Europën.

"Nuk e di se çfarë do të ndodhë. Këto janë zhvillime jopozitive, por ne po përpiqemi të bëjmë më të mirën. Kjo është.

Një shtet narkotik nuk është vetëm një kërcënim i madh për kombin ku ndodhet, por për rajonin dhe për Europën. Të dhënat e fundit tregojnë se kartelet shqiptare të drogës përcaktojnë çmimin e kokainës në të gjithë Europën.

Vetëm një person, dy persona, u gjetën se në një vit kishin trafikuar 28 tonë kokainë nga Paraguai në Roterdam dhe, mendoj, edhe në Antuerp e Belgjikë.

Këto janë zhvillime jopozitive, por ne po mundohemi të bëjmë më të mirën tonë," përmbylli Berisha fjalën e tij./CNA