web counter
LEXO PA REKLAMA!

SHKARKO APP

App Store
Google Play

Berisha: Zero TVSH për ushqimet nëse vij në pushtet, minimumi jetik do jetë 220 euro

23 Shtator 2024, 21:01, Politikë CNA
Berisha: Zero TVSH për ushqimet nëse vij në pushtet, minimumi
Kryetari i PD-së, Sali Berisha

Kryetari i PD-së, Sali Berisha bëri një premtim për qytetarët gjatë fjalës së tij në protestën e përnatshme, në rrugën “Mustafa Matohiti”.

Berisha tha se nëse do të vijë në pushtet, do të miratojë ligjin për minimumin jetik për çdo shqiptar, që sipas tij do të jetë prej 220 eurosh.

Ai deklaroi se TVSH-ja do të jetë zero për të gjitha ushqimet, ndërsa pensionet nuk do të jenë më pak se 120-130 përqind e minimumit jetik.

“Sot, unë zotohem para mbarë shqiptarëve se ligji i parë që do votohet do jetë minimumi jetik për çdo shqiptar. Minimumi jetik prej 220 euro, aq sa e ka përllogaritur Avokati i Popullit me agjencinë ndërkombëtare të punës. Por nga ana tjetër, miqtë e mi, nuk mund të tolerohet më tej kurrë që shqiptarët të kenë problemin e ushqimit sot.

Ndaj zotohem para tyre, zero TVSH për të gjitha ushqimet. Zero TVSH! Zotohem për pensionistet nuk do mund të jenë kurrë më pak se 120-130 përqind e minimumit jetik. Jo dhe jo!

Si mund ta shndërrojmë vendin ne në një laborator dhimbjesh dhe vuajtjesh njerëzore në një kohë kur vendi ka pasuritë më përrallore, por vidhen, vidhen dhe vetëm vidhen?

Unë u them shqiptarëve se përsëri do nisim marshin tonë për të dalë në krye të vendeve të rajonit për rrogat dhe pensionet. Asnjë vend nuk ka pasuritë e Shqipërisë, ja pse shqiptarëve u takon të jenë më të mirëshpërblyerit në rajon. Po shqiptarët janë më të keqshpërblyerit sepse vidhen nga një bandë kriminale.

Po si mund t’ua bësh ti një akt të tillë, t’u premtosh rritjen në mars dhe prill dhe t’ua bësh vetëm në tetor për tre muaj? Dhe të rrëmbesh paratë e tyre. Dhe pse? Se do u jap unë një bonus atyre për vota, siç bëri”, theksoi ish-kryeministri./ CNA





Lajmet e fundit nga