Balla “i shtrin dorën” PD-së/ Kërkon bashkëpunim në emër të Shqipërisë europiane

21 Korrik 2022, 18:06, Politikë CNA

Balla “i shtrin dorën” PD-së/ Kërkon bashkëpunim

Kreu i Grupit Parlamentar të PS, Taulant Balla

Kreu i Grupit Parlamentar të PS, Taulant Balla, ka bërë një thirrje për deputetët e Partisë Demokratike gjatë fjalës së tij në seancën parlamentare.

Balla i kërkoi deputetëve që të mos krijojnë debate, por të bashkëpunojnë për çështjet që lidhen me procesin e anëtarësimit të Shqipërisë në BE dhe për transpozimin e përafrimin e ligjeve.

Ai theksoi se në këtë fazë është e rëndësishme që të gjithë të bëhen palë, në mënyrë që të mos shtyhet shumë gjatë anëtarësimi në BE.

“Marrëveshja për anëtarësim mund të kërkojë 34 muaj si Letonia, por edhe 654 muaj si Bullgaria dhe Rumania. Mund të kërkojë edhe 100 muaj, por nga ky moment nuk ka asnjë dyshim që Shqipëria do të jetë anëtare e BE. Kjo koha varet nga ne dhe sesi do të dimë ne ta shfrytëzojmë. I propozoj opozitës që për çështjet që lidhen me procesin e anëtarësimit të Shqipërisë në BE dhe transpozimin e ligjeve dhe përafrimin e ligjeve ne të kemi dakordësi dhe të mos kompleksohemi nga debati politik i ditës. Në këtë fazë është e rëndësishme të jemi palë. Jo pa qëllim e përmenda Letoninë dhe Sllovakinë që në më pak se tre vite arritën të mbyllin kapitujt.

Ajo që ka rëndësi është që në këto vende në këtë kohë ka pasur dialog politik dhe marrëveshje në të mirë të vendit, shumë vite do të kërkojnë 84 vota që PS nuk i ka. Është momenti që në emër të Shqipërisë europiane, grupi më i madh i opozitës, PD duhet të shprehet në favor të bashkëpunimit, nuk është herezi bashkëpunimi me mazhorancën.

Shumë të gatshëm për të nisur menjëherë në seancën e parë për ndryshimin e ligjit për rolin e Kuvendit në proces. Ligji kishte vlerë deri pardje, prej sot është shumë i vjetër për rolin udhëheqës që duhet të luajë Kuvendi në këtë proces. Mendoj që nuk kemi shumë gjëra për të qenë kundër. ajo që ka konsensusin e plotë publik është të bëhemi bashkë për të përfunduar procesin”, deklaroi kreu i Grupit Parlamentar të PS-së ndër të tjera./ B.A. – CNA.al