Parkimi i gabuar në pranga, korrupsioni në liri!

13 Shkurt 2026, 15:18, Opinione Grigels Muçollari

Teksa dëgjoj kryeministrin që kritikon drejtësinë për nivelin e lartë të të paraburgosurve, por edhe analistë që i bëjnë jehonë kësaj kritike, pyetjet që vijnë natyrshëm janë:
A nuk ishte vetë Rama që kërkonte burg për lidhjet e paligjshme të energjisë?
Burg për ujin.
A nuk ishte qeveria e tij që ashpërsoi ndëshkimet për ndërtimet pa leje, deri te çatia e hedhur pa autorizim?

A nuk u fol për burg për shkelje të masave administrative gjatë pandemisë?
Dhe së fundi, a nuk u kriminalizua edhe parkimi i dyfishtë si kundërvajtje penale?
Po për protestuesit që kërkojnë ndëshkim për korrupsionin qeveritar a nuk është Rama që kërkon burg?

Për vite me radhë, receta ka qenë e njëjtë: ashpërsim penal për shkelje të lehta, retorikë force dhe nënshtrimi.
Nga goja e Edi Ramës ka dalë fjala burg më shumë se nga çdo gardian.

Tani na del që ai ankohet se është tepruar, abuzuar. Por nuk ka pendesë për burgjet që ka mbushur vetë.
U ndërtua një kulturë ndëshkimi që godiste kryesisht qytetarët e zakonshëm. Burgu u përdor si simbol autoriteti dhe si mjet presioni për nënshtrim, përmes frikës.

Por sot, kur çështjet penale dhe masat e sigurisë afrohen te nivelet e larta qeveritare dhe te korrupsioni i rëndë, toni ndryshon. Papritur paraburgimi shihet si problem, si teprim, si shqetësim për standardet. Aty ku dje kërkohej ashpërsi pa kompromis për qytetarin, sot kërkohet kujdes maksimal për pushtetin.

Nuk ka barazi mes një parkimi të gabuar dhe abuzimit me fondet publike. Nuk ka barazi mes një çatie pa leje dhe korrupsionit në nivelet më të larta të qeverisjes. Qytetarët nuk duhet të shkonin në burg për shkelje të tilla të lehta. Ndërsa zyrtarët që abuzojnë me pushtetin duhet të mbajnë përgjegjësi reale për shkeljet e rënda.

Kur burgu përdoret për të disiplinuar popullin dhe për të ndërtuar imazh populist, por vihet në diskutim kur prek qeveritarët, kjo tregon se pushtetari është kthyer në pushtues, se të flasësh për moralin qeverisës do të ishte humbje kohe pasi jo vetëm që ka kohë që nuk ekziston por ka infektuar edhe moralin shoqëror.

Nëse për vite me radhë burgu u shpall zgjidhje për çdo problem të vogël, sot duhet pranuar një e vërtetë e thjeshtë: drejtësia duhet të jetë proporcionale për qytetarët dhe e pakompromis për nivelet e larta dhe njëkohësisht edhe shoqëria e ka detyrimin edhe më të lartë që të reagojë me gjithë forcën që duhet për ta pasur këtë parim vlerë morale të saj.

Nëse kërkohet burg për korrupsionin qeveritar, nuk e ka fajin Kodi, por hajduti. Nëse kërkohet shpesh, është se vidhet shumë, nuk e ka fajin Kodi.