E fundit!

10:54 Politikë

Protestat/ Rama: Qytetarët do të fitojnë, shembëlltyra e zezë që i keqpërdori do të dështojë

Kryeministri Edi Rama ka bërë një reagim në rrjetet social...

Fred Beleri, i burgosuri VIP që zëvendësoi Luizin, VIP-in e “Big Brother”-it

18 Maj 2023, 12:50, Opinione Xhovan Shyti

Fred Beleri, i burgosuri VIP që zëvendësoi Luizin, VIP-in e

Nga Xhovan SHYTI

Prej më shumë se dhjetë ditësh, Fredi Beleri, kryebashkiaku i Himarës, ka zëvendësuar Luis Ejllin e “Big Brother VIP” në hitparadën e jetës së përditshme të shqiptarëve, më shumë se 60% e të cilëve e shkojnë jetën në varfëri.

Iku Luisi, erdhi Beleri për t’u dhënë frymëmarrje e punë mediave të mbushura me parazitë që vegjetojnë zyrave dhe nuk zbresin në terren për të evidentuar mizëritë e halleve të qytetarisë, më shumë se 60% e të cilëve bojkotuan pjesëmarrjen në votime, pikërisht nga pakënaqësia e keqqeverisjes së derisotme.

Në ndryshim nga Luisi, që me shumicë e ndeshje kryesisht në emisionin “Big Bradher VIP”, Fred Belerin e gjen ngado e kudo. Në çdo emision, në “prime time” lajmesh e emisione të dedikuara politikës, por jo vetëm. E ndesh te kronikat e lajmeve e të emisioneve radio-televizive, në rubrikën e kronikës së gazetave e portaleve, në biseda klubesh, kafenesh, në zyra etj., etj. Mjafton të hapësh televizorin dhe fytyra e parë që të del është ajo e Fredi Belerit, kryebashkiakut të Himarës, që fitoi zgjedhjet nga burgu, ku u mbyll katër ditë para ditës së votimeve. Akuza ndaj tij ishte blerja e votave. Më së paku këtë ka përmendur prokuroria me urdhër të së cilës Belerit iu hodhën prangat. Për çfarë?

Edhe në prononcimet e mëpasme, prokuroria ka përsëritur të njëjtën akuzë për të cilën akuzohet Fredi Beleri, duke përmendur në mënyrë konsistente së bashku me pasjen e provave të qarta që e vërtetojë dhe mbështesin arrestimin. Por dhe ngritjen e akuzës së rëndë penale ndaj të burgosurit të bërë VIP, njësh si Luisi i “Big Brother”, falë kontributit të medias e politikës që fut kudo hundët dhe nuk lejon kompetentët e hetimit të veprojnë në liri. Pa presion e trysni. Nga brenda e nga jashtë.

Sepse falë dy nënshtetësive që mban, në ndryshim nga fama brendavendore e Luisit, fama e Belerit i ka kaluar kufijtë politikë të Shqipërisë e Greqisë (ku po ashtu është bërë prioritet i qeverisë). Fytyra e tij është bërë emblematike edhe në mediat greke, ndërsa pritet të shohim nëse do të ndodhë kjo edhe me mediat ndërkombëtare, pas ngritjes së çështjes “Beleri” në Bruksel.

Këtë e ka deklaruar ministri i Jashtëm grek, Nikos Dendias, i cili, pasi e vlerëoi tepër të rëndë, në trajtë kërcënimi premtoi se ditën e hënë do ta bëjë të madhe në Bruksel. Deklaratën e jonjëhershme të arrestimit të Fredi Belerit, Dendias e bëri, ndërsa fliste në televizionin “STAR”, nga ku kërkoi që Beleri të lirohet menjëherë nga qelia. Refren që e përsëriti në sallën e Parlamentit edhe Vangjel Dule në trajtë ultimative. Dhe pikërisht ky ultimatum është i papranueshëm. Ky është intimidimi i pastër, që e njollos edhe më shumë paanshmërinë e hetimit. Daljen në një konkluzion dhe marrjen e një vendimi të drejtë që do të ndajë shapin nga sheqeri.

Gjithë sa përmendëm më sipër është e pranueshme në këtë “lojë” drejtësie që nisi pas vlerësimit të provave që e kriminalizuan ish-kandidatin për kryebashkiak, Fred Beleri, që sollën prangosjen e tij dhe ngritjen e stuhisë, që zëvendësoi famën e Luis Ejllit dhe vijon ende nën kredon e turpshme ultimative: “Të lirohet mënjëherë se është i burgosur politik, i rrëmbyer nga sekti i rilindjes dhe Rama”.