E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

5 pyetje për Bujar Kapexhiun

14 Qershor 2022, 10:27, Opinione Agim Xhafka

Foto ilustruese

1.'Bordi i Çmimeve’ u ngrit për të ndihmuar njerëzit e thjeshtë apo është alibi për vjedhjen që i bëhet popullit?

-Që ta dini mirë, ‘Bordi i Çmimeve’ nuk u ngrit për njerëzit e thjeshtë, por është një formë e ndërlikuar për të vjedhur sa më shpejt e sa më thjeshtë. Gjer tani grabitja ka qenë e decentralizuar, rrëmbehej paraja në mënyrë individuale, në qeveri dhe në administratë. Ndërsa tani e tutje me Bordin e sajuar vjedhja do të jetë e centralizuar, e planifikuar, e organizuar dhe e sofistikuar.

Për këtë pyetje më lejoni dhe mua të bëj një pyetje me përgjigjen brenda. Meqë të gjitha pushtetet janë në një dorë, përse kjo dorë të mos ketë dorë edhe në vjedhje?!

2. Përse Berisha nuk arriti të mbledhë rreth vetes shumicën e deputetëve?

- Berisha në një kohë rekord mblodhi rreth vetes shumicën e anëtarësisë. Anëtarësia është e përhershme, ndërsa mandati i deputetit është i përkohshëm. Berisha gjithë jetën e tij nuk ka synuar të përkohshmen, ka luftuar për të përhershmen. Kaq.

3. A të duket represion nga Rama ndaj partive opozitare, PR, PDK, PBDNJ, që iu sekuestroi zyrat e tyre dhe i nxori të gjithë në rrugë?!

- Jo, nuk më duket fare represion, përkundrazi më duket një veprim i mirëmenduar. Të tria këto parti janë mbyllur në zyrë dhe çdo katër vjet fitojnë nga PD një mandat deputeti. Sot kur e gjithë opozita po përgatitet të dalë në rrugë, me protesta masive, atëherë përse u duhen zyrat këtyre? Se të gjithë ndërkohë do të dalin në rrugë. Ky është një shans për këto parti kur ke një kryeministër arrogant, por largpamës!

4. "Ballkani i Hapur" është segment i procesit të Berlinit, tha Rama sapo kancelari gjerman e injoroi si nismë politike. Ndodhi si qëmoti, kur shkruhej për varfërinë në Pukë p.sh.; gazetat e kohës e lavdëronin, e quanim qytet europian nga që ishte vërtet në Europë. Dridhet gjuha në këtë rast apo përdridhet Rama?

- Fillimisht dua të theksoj se ky nuk është Ballkan i hapur, por Ballkan... i Kapur. Për sa i takon dredhjes dhe përdredhjes po ju siguroj që këto janë dukuri të politikanëve karrieristë. Ka tipa që dredhin gjuhën dhe mbajnë statik trupin, të tjerë dredhin trupin e mbajnë statik gjuhën, ndërsa Rama i dredh dhe i përdredh të gjitha, gjuhën, trupin, mendimin, vendimin dhe premtimin. Ai e njeh mirë thënien popullore ‘Po e drodhe, hendekun e hodhe!’ S’besoj t’ia hedhë këtë radhë!

5. Përse në botë 1 km autostradë kushton 6 - 8 milionë euro dhe te ne çmimi fluturon deri në 60 milionë euro për 1 km?

- Mos harro kryesoren, ne jemi tjetër botë e përderisa në këtë botën tonë shkon në qiell çmimi i naftës, i domates, i qepës e kastravecit, përse të mos rritet edhe çmimi i rrugëve? Dihet, në tregun e lirë çmimin e ushqimeve e vendosin tregtarët, ndërsa çmimin e rrugëve te ne e vendosin… rrugaçët.