Pas ankesës së kompozitorit Valentin Veizi/ Merren masa për duetin e Elsa Lilës dhe Capital T

3 Janar 2023, 16:31, Lifestyle CNA

Pas ankesës së kompozitorit Valentin Veizi/ Merren masa për

Elsa Lila, Valentin Veizi

Festivali i Këngës në "RTSH" këtë vit u shoqërua me polemika të shumta. Në natën e tretë të gjithë konkurrentët kënduan në duet me artistë të tjerë të njohur.

Elsa Lila u rikthye në skenë pas 25 vitesh me këngën e saj ikonike “Pyes Lotin”, si dhe u shpall fituese e çmimit të parë në festival.

Këngën e saj ajo e risolli në duet me reperin Capital T në ditën e tretë, mirëpo kjo gjë nuk është pritur aspak mirë nga kompozitori i këngës Valentin Veizi.

Më herët ai shkroi se kënga u këndua pa lejen e tij, e madje ai u shpreh se ky ishte versioni më i shëmtuar i saj.

Së fundmi, në një intervistë për “Euronews”, kompozitori tregoi se nuk ka folur me Elsa Lilën, ndërkohë që ka ndierë dhimbje kur ka parë këngën e tij “të deformuar”.

“Duhet të komunikonin ata me mua për këtë mendim që kishin. Nuk kam arsye të flas me këdo, nuk do e bëj pazar me muhabete telefoni. Shikoj në YouTube, në ekran këngën time, e dëgjoj me autor tjetër, një këngë që unë jam krenar për” Pyes Lotin “. Unë kam thënë mos ma bëni pis, në fakt është më tepër, është dhimbje. Më mirë mos e kisha dëgjuar në fakt, sa keq jam ndjerë kur kam dëgjuar atë këngë në atë variant që u soll”, theksoi ai.

Pas ankesës së Veizit, kënga është fshirë nga "YouTube", pavarësisht se kompozitori u shpreh se kjo nuk është një luftë personale, por i dhemb kur e sheh këngën e tij ashtu të deformuar, pa lejen e autorëve.

”Pyes Lotin “e merr X-Y, pa leje dhe e bën si do vet. “Këputa një gjethe dafine” e merr një reper tjetër, “Për ty atdhe” e merr dikush tjetër. Çfarë mbetet? Po shndërrohet kultura e këngës shqiptare, dëmi është shumë i fuqishëm. Nuk jam kundra sjelljes në kohë, unë kam shumë këngë që janë sjellë ndryshe, por pa ndryshuar strukturën dhe duhet kujdes me këtë punë. Nuk preket, janë disa gjëra që nuk preken. Mos i prek se të djegin, mos e prek zjarrin. Ti mund te marrësh tokën e dikujt është ta nxjerrësh e nga shtëpia, por artin nuk e merr dot”, nënvizoi Veizi./CNA.al