E fundit!

22:44 Aktualitet

Eric Wendt një hap larg emërimit/ Komiteti i Senatit voton pro gjeneralit si ambasador i SHBA-së në Shqipëri

Komiteti për Marrëdhëniet me Jashtë i Senatit amerikan ka ...

Nga Harvardi në majat e teknologjisë/ Si Mark Zuckerberg krijoi "Facebook"-un

4 Shkurt 2026, 10:31, Kuriozitete CNA

Mark Zuckerberg

Dimri i ashpër në Kembrixh të Masaçusetsit nuk e ndali Mark Zuckerberg. Mes studentëve të mbështjellë me xhaketa të trasha në kampusin e Harvardit, ai binte në sy me pantallona të shkurtra dhe shapka, i përqendruar pas kompjuterit. Pikërisht aty, në një dhomë konvikti, ai hodhi themelet e asaj që do të bëhej një nga platformat më të fuqishme të historisë moderne.

Më 4 shkurt 2004, Zuckerberg lançoi “The Facebook”, pa e ditur se po ndryshonte mënyrën e komunikimit global. Vetëm dy vjet e gjysmë më vonë, ai refuzoi një ofertë prej 1 miliard dollarësh nga Yahoo, i bindur për potencialin e platformës.

Bashkëthemelues të "Facebook" ishin Dustin Moskovitz, Chris Hughes dhe Eduardo Saverin, ky i fundit me rol kyç në financimin fillestar. Një kthesë erdhi me Sean Parker, i cili sugjeroi zhvendosjen në Palo Alto dhe heqjen e fjalës “The” nga emri. Investimet nisën të rriteshin, përfshirë 500 mijë dollarë nga Peter Thiel, ndërsa brenda pak muajsh platforma arriti mbi një milion përdorues.

Suksesi u shoqërua me konflikte ligjore. Saverin u largua pas përplasjeve me Zuckerberg, ndërsa "Facebook" u përball edhe me padinë e vëllezërve Winklevoss, e mbyllur me një marrëveshje prej 65 milionë dollarësh. Në vitin 2012, kompania bleu "Instagram"-in për 1 miliard dollarë dhe doli në bursë, duke mbledhur 16 miliardë dollarë. Dy vjet më vonë, bleu "WhatsApp"-in për 22 miliardë dollarë.

Rrjeti social u përball me tronditje të forta nga skandali i Cambridge Analytica, ku u zbulua përdorimi pa pëlqim i të dhënave të rreth 87 milionë përdoruesve për qëllime politike. Zuckerberg dëshmoi para autoriteteve dhe "Facebook"-u u kritikua globalisht për shkelje të privatësisë.

Pavarësisht polemikave, kompania vazhdoi zgjerimin, duke arritur miliarda përdorues aktivë dhe duke ndërtuar qendra gjigante të të dhënave në mbarë botën. Nga një ide studentore në Harvard, "Facebook"-u u shndërrua në një platformë që ka ndikuar thellë në shoqërinë globale, me sukseset dhe dilemat e saj./CNA