Zhdukja e dy të fortëve të Sarandës/ Kush fshihet pas rrëmbimit, lidhja me Aleksandër Sadikajn

1 Maj 2023, 12:43, Kronika CNA

Zhdukja e dy të fortëve të Sarandës/ Kush fshihet pas

Detaje të reja janë zbuluar nga zhdukja e dy të fortëve në Sarandë, Fatmir Sulovarit dhe Leonard Thodhorit.

Sipas "Xhungël.al" një grup i strukturuar kriminal i specializuar për trafikimin e lëndëve narkotike ka organizuar rrëmbimin dhe më pas eliminimin fizik të Sulovarit dhe Thodhorit, i njohur me nofkën “Koçolja”, mesnatën e së enjtes së 6 prillit 2023, në qytetin e Sarandës.

Prokuroria dhe policia nuk kanë ende një përgjigje në lidhje me fatin e dy të zhdukurëve, por ka një panoramë, më të qartë të asaj çfarë ka ndodhur.

Policia ka ndaluar 8 automjete, ka kontrolluar disa banesa, ka këqyrur dhjetëra kamera sigurie si dhe ka zbardhur komunikimet telefonike të personave të dyshuar duke arritur në përfundimin se, pas ngjarjes ndodhet një strukturë kriminale.

Kjo strukturë kriminale, rezulton të ketë një aktivitet të gjatë në trafikun e narkotikëve, fillimisht të kanabisit nga Shqipëria drejt Greqisë dhe më pas ka kaluar në trafikun e drogave të forta. Ky grup kriminal ka siguruar një linjë të trafikut të kokainës nga Amerika Latine drejt Europës.

I njëjti grup kriminal, dyshohet se ka organizuar dhe finalizuar atenatin me minë të telekomanduar të 11 qershorit 2022, kur afër rrethrrotullimit të TEG-ut humbi jetën në një atentat mafioz, 27-vjeçari Aleksandër Sadikaj.

Deri tani dy ngjarjet rezultojne të mos kenë lidhje me njëra-tjetrën, edhe pse janë kryer nga e njëjta strukturë kriminale.

Në rastin e zhdukjes së Sulovarit dhe Thodhorit rezulton se synimi ka qenë vetëm rrëmbimi i tyre për një marrëveshje që ka shkuar keq, por autorët i kanë futur në kurth, duke i rrëmbyer, ku më pas dyshohet se janë eliminuar fizikisht dhe janë fshehur.

Deri tani, Prokuroria ka arrestuar vetëm shtetasin Sofokli Andrea Baxheri, i datëlindjes 7/11/1995, i cili ka shërbyer në rol ndihmës, si dhe në gjetjen e mjeteve apo bazës së sigurtë ku kanë vepruar autorët. Ndërkohë janë shpallur në kërkim policor të paktën 5 shtetas të tjerë, dy prej të cilëve me rol kryesor në grup, dyshohet të jenë larguar menjëherë pas ngjarjes për në Dubai.