web counter
LEXO PA REKLAMA!

SHKARKO APP

App Store
Google Play

E fundit!

x

Të pafajshmit, viktima të krimit/ Vrasjet që tronditën vendin

31 Tetor 2024, 09:02, Kronika CNA

Të pafajshmit, viktima të krimit/ Vrasjet që tronditën

Ngjarjet kriminale të ndodhura së fundi kanë tronditur mbarë opinionin publik.

Rasti më i fundit ishte ai në Dobraç të Shkodrës ku u qëllua me breshëri plumbash ndaj automjetit ku ndodheshin Hamza Lici dhe Arlind Bushati, të cilët humbën jetën.

Një ngjarje e tillë la pas dhe një viktimë të pafajshme, kalimtare të rastit.

Flutura Basha humbi jetën teksa së bashku me bashkëshortin e saj po ktheheshin në shtëpi me motor.

Ata janë përplasur nga makina ku ndodheshin Arlind Bushati dhe Hamza Lici.

Gruaja ka ndërruar jetë menjëherë në vend, ndërsa bashkëshorti i saj Bashkim Basha po lufton për jetën në spital.

Po ky nuk është rasti i vetëm ku krimi prek të pafajshmit.

Vrasja e kamarierit në Memaliaj

Jo më larg se 4 muaj më parë një atentat tipik i vrasjeve në masë rezultoi me një bilanc po ashtu dramatik, tre të vdekur.

Mbrëmjen e 21 korrikut 2024 në një lokal në Memaliaj mbetën të vrarë Shyqyri Kalemi, babai i Andrea Kalemit i dyshuar për vrasjen e biznesmenit Edmond Papa, kamarieri Gledio Muka dhe klienti Marsel Çela.

Siç u mësua më pas, shënjestër e atentatit ishte Shyqyri Kalemi, por krahas tij plumbat nuk falën as Gledio Mukën që punonte për bukën e gojës dhe as klientin e lokalit, i cili kishte zgjedhur që atë mbrëmje të ngrohtë korriku ta kalonte jashtë shtëpisë, deri në orët e vona.

I ndodhur në vendin dhe kohën e gabuar i kushtoi jetën.

Breshëri plumbash mbi banakieren e lokalit në Don Bosko

Por për ta kuptuar më mirë se si krimi i organizuar gabon në shënjestër duke vrarë të pafajshëm mjafton të kujtojmë atentatin e Don Boskos, në Tiranë, 12 marsin e vitit 2023. Një grua u qëllua për vdekje në vendin e saj të punës, në ambientet e një lokali. Një breshëri kallashnikovi nga një automjet në lëvizje nuk ka për qëllim të frikësojë, por plumbat përqendrohen të gjithë në një perimetër të vogël. 58-vjeçarja Mimoza Paja ishte në vendin e saj të punës kur iu mor jeta pabesisht. Nga kjo ngjarje nuk u kursye as mbesa e saj e mitur e cila mori lëndime nga thyerja e xhamave. Ndërsa 5 persona të tjerë morën plagë në pjesë të ndryshme të trupit nga plumbat, por fatmirësisht nuk rezultuan në fatalitet.

Atë pasdite të 12 marsit u qëllua me breshëri plumbash lokali i Fatjon Muratit, person i shumëkërkuar nga autoritetet. Ky i fundit është një personazh i njohur për policinë. Fatjon Murati dyshohet i përfshirë në masakrën e Fushë Krujës ku u ekzekutuan Brilant Martinaj, Besmir Haxhia dhe Diklen Vata. Gjithashtu, Fatjon Murati ka qenë i dënuar për armëmbajtje dhe posedim të municioneve pa leje. Prokuroria e Tiranës i ka sekuestruar Fatjon Muratit një pasuri me vlerë 5 mln euro.

Vrasja e Enea Themollarit

29-vjeçari humbi jetën nga tritoli që u vendos në banesën e dy motrave Nikolli, pasi Giovana Nikolli iu drejtua me një video Nuredin Dumanit. 

Banesa e Themollarit ishte ngjitur me banesën e motrave Nikolli në pallatin ku jetonin.

Ai pas disa ditësh në koma ndërroi jetë nga plagët e marra. 29-vjeçari nuk kishte asnjë lidhje me motrat Nikolli apo me botën e krimit.

Ishte një njeri që punonte për të mbajtur familjen e tij dhe humbi jetën pas tritolit që u shpërthye ngjitur me derën e banesës. / CNA





Lajmet e fundit nga