web counter
LEXO PA REKLAMA!

SHKARKO APP

App Store
Google Play

E fundit!

x

Sky, “Kutia e Pandorës” që do të zbulojë misterin për zhdukjen e Martinajt

28 Maj 2024, 10:18, Kronika CNA

Zhdukja e të shumëkërkuarit të drejtësisë, Ervis Martinaj, vijon të jetë një mister, ndërkohë që janë ngritur shumë aludime për rrëmbim apo edhe për një skenar të inskenuar nga vetë ai.

Për gazetarin Artan Hoxha, Martinaj është vrarë nga kundërshtarët. Ai deklaroi në një dalje televizive se autorët mund të zbulohen nga bisedat në aplikacionin "SKY".

Hoxha tha se "SKY" kishte dalë nga qarkullimi në momentin e zhdukjes së Martinajt, por nënvizoi se jep indicie të forta për aleancën e kundërshtarëve që kishin synim ta eliminonin.

“Ervis Martinaj mund t’i fshihej kujtdo, ama jo atyre që e kërkonin dhe e gjetën. Vis Martinaj u zhduk një vit e gjysmë pasi 'SKY' kishte dalë nga qarkullimi. Por 'SKY' të jep një indicie se cila është aleanca që po krijohet për ta goditur Ervis Martinajn. Ka arritur puna deri aty sa edhe vetë këta ustallarët e krimit të organizuar kuptuan që Vis Martinaj po i kthente kundër njëri-tjetrit.

Të gjithë armiqtë e Ervis Martinajt u bënë bashkë për ta zhdukur. Pasi kjo aleancë nxori nga qarkullimi Ervis Martinajn, Shqipëria ra në qetësi. Kjo lloj qetësie vjen nga këta faktorë. Në 2023-shin ka vetëm 34 të vrarë. Aleanca që u krijua nuk do të zgjaste pafundësisht. Pasi vranë Martinajn, synuan të marrin bizneset dhe pasuritë e Visit. I morën. Pasi ndanë plaçkat, filluan të godasin njëri-tjetrin.

Unë kur kam dalë për herë të parë pas rrëmbimit, vrasjes dhe zhdukjes së kufomës së Ervis Martinajt kam thënë: Edhe shteti ka qenë i interesuar që ai të zhdukej. Por më shqetëson se përse Sali Berisha nuk flet, sepse e ka mik familjar. Kur foli Berisha pastaj, ai tha: Ky është zhdukur nga shteti.

Grupet më të fuqishme në Shqipëri sot janë ata që përdorin edhe lidhjet me shtetin për të goditur kundërshtarët”, theksoi gazetari./ CNA





Lajmet e fundit nga