web counter
LEXO PA REKLAMA!

SHKARKO APP

App Store
Google Play

E fundit!

x

Përfitoi deri 40 mijë euro duke shantazhuar me foto intime/ Arrestohet 47-vjeçari

26 Shkurt 2026, 09:39, Kronika CNA

Përfitoi deri 40 mijë euro duke shantazhuar me foto intime/ Arrestohet

Policia e Korçës ka finalizuar pas 4 muajsh një operacion për goditjen e një rasti shantazhi.

Si rezultat ka rënë në pranga një 47-vjeçar, i cili kishte përfituar 4000 euro duke shantazhuar nëpërmjet fotove intime një shtetas grek.

Shantazh i kryer për një periudhë 3-vjeçare.

Gjithashtu dyshohet se ky shtetas ka kërcënuar shtetas të tjerë grekë, duke përfituar shuma deri në 40 mijë euro.

 

 

Njoftimi i policisë

 

Finalizohet nga Seksioni për Hetimin e Krimeve Ekonomike dhe Financiare, operacioni policor i koduar "Blackmail". Operacioni, rezultat i 4 muajve hetime me metoda proaktive.  

I mori 4000 euro një shtetasi grek, duke e shantazhuar për rreth 3 vjet, se do t'i publikonte biseda dhe foto intime, vihet në pranga 47-vjeçari. 

Specialistët e Seksionit për Hetimin e Krimeve Ekonomike dhe Financiare të DVP Korçë, si rezultat i hetimeve të kryera për një periudhë 4-mujore, me metoda speciale, në drejtimin e Prokurorisë, organizuan dhe finalizuan operacionin policor të koduar "Blackmail".

Në kuadër të operacionit u vu në pranga shtetasi K. J., 47 vjeç, banues në Korçë, për veprat penale "Shtrëngimi me anë të kanosjes ose dhunës për dhënien e pasurisë" dhe "Mashtrimi".

Nga hetimet dyshohet se shtetasi K. J., për një periudhë rreth 3-vjeçare, nëpërmjet shantazhit për publikimin e bisedave dhe fotove intime, ka përfituar rreth 4000 euro, nga një shtetas grek. Gjithashtu, shtetasi K. J. dyshohet se me të njejtin mekanizëm, ka përfituar edhe nga shtetas të tjerë grekë, shuma të konsiderueshme parash, që variojnë nga 30 000 - 40 000 euro. 

Vijojnë hetimet për identifikimin dhe vënien përpara përgjegjësisë ligjore, të shtetasve të tjerë të përshirë në këtë aktivitet kriminal.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.





Lajmet e fundit nga