Atentatorët mbështetje shumë të madhe në polici"/Tela: Porosia ka qenë që të ndodhë pikërisht aty

12 Nëntor 2025, 19:08, Kronika CNA

Atentatorët mbështetje shumë të madhe në

Gazetari Andi Tela, i ftuar në emisionin “Task Force” ka folur për atentatin e djeshëm në rrethrrotullimin e Rinasit.

Tela deklaroi se atentati ndodhi në zonën më të sigurt në Shqipëri dhe u shpreh se kjo ngjarje ka pasur një regjisor.

Më tej, gazetari tha se atentati mund të jetë porositur për të ndodhur pikërisht aty ku ndodhi, për të treguar forcë.

Tela u shpreh se që të ndodhë i gjithë ky organizim duhet një mbështetje shumë e madhe në polici, por dhe më lart se policia.

“Këta që na qeverisin mund të dalin prapë me variantin që këto gjëra i shikoni më tepër për filma.

Por nëpër filma i vendos regjisori. Pa u zgjatur, si t’i dojë qejfi atij. Pra, i vendos njerëzit, e merr makinën dhe e çon ku t’i dojë qejfi. Në këtë rast ne ndodhemi, atë që po themi të gjithë në zonën praktikisht më të sigurt në Shqipëri. Pra, ti nuk e mendon kurrë që në Sheshin “Skënderbej” dikush mund të vritet dhe të mos kapet nga policia. Edhe këtu, që ti të bësh një vrasje të tillë, duhet të jesh regjisori i kësaj vrasjeje.

Pra, ti ke vendosur që atë ditë mos të ketë makinë policie atje dhe as polic. Që atë ditë kjo makinë, mbasi bën vrasjen që i zgjat një minutë gjithë ekzekutimi të marrë makinën dhe të shkojë 14 km larg, në një rrugë që historikisht ka pasur trafik. Të kalosh urën, të kalosh postblloqe të ndryshme policie, apo çdo pengesë të mundshme, dhe të shkosh të djegësh makinën e të vazhdosh jetën normalisht. Pra, një regjisor, i cili është shumë më i fuqishëm sesa shoferi i makinës, ka vendosur që mos të ketë polic dhe askush mos t’i bëjë barrikadë autorëve të vrasjes. Këtu duhet kuptuar se cili është pozicioni i atij që ka porositur vrasjen. Sa i fuqishëm është ai apo ata që e kanë porositur këtë vrasje, sepse ata të tretë që ekzekutojnë ata janë një grup komando që kanë marrë përsipër ta bëjnë atë punë dhe e bëjnë ashtu siç e dinë ata. Po, porosia, dhe unë mendoj që edhe kërkesa ka qenë e atillë, të ndodhë aty. Sepse ata mund ta kryenin këtë vrasje nga këtu deri te shtëpia ku do shkonte Dani; mund të gjendeshin njëqind vende të tjera për ta kryer.

Por ata e donin pikërisht atje, për të treguar forcë. Dhe nëse sot, në përfundim të kësaj ngjarjeje, merr në akuzë dy punonjës policie që kanë përgatitur letrat e shoferit të plagosur, më kujton pak a shumë të njëjtën skenë të ndodhur në Bllok me vrasjen e bankierit Santo. Penalizuan policin rrugor, i cili duhej të ndalonte dy autorët e vrasjes, që nga ai moment ata kaluan te kryqëzimi i presidencës ku ishte një polic tjetër, dhe arritën të shkonin në të njëjtin vend dhe të zhdukeshin, pa i parë më njeri. Pra, ka një organizim i tillë që të bën të dyshosh të gjithë, prandaj çuditemi ne dhe themi, si ka mundësi që të ndodhin këto gjëra? Por që të ndodhin këto gjëra, sigurisht që duhet të kesh një mbështetje shumë të madhe mbështetje në polici, por edhe më tepër sesa nga policia”, tha Tela./CNA