web counter
LEXO PA REKLAMA!

SHKARKO APP

App Store
Google Play

E fundit!

x

Kush është Dritan Rexhepi/ “Bossi” i kartelit të drogës dhe vrasjet e shqiptarit nga Shqipëria në Itali

10 Nëntor 2023, 10:53, Kronika CNA

Kush është Dritan Rexhepi/ “Bossi” i kartelit të

“Mbreti i kokainës”, siç njihet bosi shqiptar i drogës, Dritan Rexhepi, u arrestua këtë të premte në Turqi, pasi rezulton me 3 alarme të kuq nga Interpoli.

Ai u vu në pranga për shkak të akuzave të ngritura nga autoritetet shqiptare dhe italiane ndaj Rexhepit, siç janë vrasje me dashje, trafikim droge dhe rrëmbim.

Shqiptari u është shmangur disa herë autoriteteve të shteteve të ndryshme duke përdorur identitete të ndryshme, në Stamboll kishte hyrë me pasaportën kolumbiane që mbante emrin Benjamin Omar Perez Garcia.

Kush është Dritan Rexhepi

Rexhepi është një emër shumë i njohur i botës së krimit. Ai cilësohet si kapoja e kartelit që kontrollonte trafikun e drogës nga Ekuadori në Evropë.

Ai është skeduar nga disa shtete për aktivitetin e tij kriminal. Shqiptari, i cili është koka e kompanisë “Bello”, u kap në Ekuador me 278 kilogramë kokainë në vitin 2014 në një operacion të quajtur "Balcanes" dhe u dënua me 13 vite burg.

“Bossi” i drogës vuajti dënimin për disa vite, ndërsa aktivitetin e tij e kontrollonte nga burgu, ndonëse autoritetet kanë mohuar që kapo të ketë pajisje celulare në qeli.

Rexhepi gjithashtu rezulton me skemë kriminale edhe në Belgjikë, Holandë, Spanjë, ndërsa është në kërkim edhe nga autoritetet italiane.

Krimet e Dritan Rexhepit

Autoritetet italiane e akuzojnë atë se ka urdhëruar të paktën dy vrasje gjatë qëndrimit në burg, në Ekuador dhe Shqipëri. Shqiptari ka mohuar përfshirjen e tij në këto krime.

Ndërsa në Shqipëri, Dritan Rexhepi, deri në vitin 2014, ishte në top listën e 10 më të kërkuarve nga Interpol Tirana. 

Në Shqipëri ai është i dënuar në mungesë me 25 vite burgim, për vrasjen e dy policëve në Fushë-Krujë, Arben Keqi e Durim Kasmi, ngjarje kjo e ndodhur në vitin 1998.

Policia shqiptare e ka cilësuar asokohe si vrasësin e parë me pagesë.

Gjithashtu, SPAK e akuzon atë se ka urdhëruar rrëmbimin e 49-vjeçarit Jan Prenga në 17 janar të vitit 2020. Viktima nuk u gjet kurrë dhe supozohet se ka humbur jetën.

Në Barcelonë të Spanjës ai akuzohet se realizoi grabitjen e një prej bankave më të mëdha, mbrëmjen kur gjithë tifozët gjendeshin në shesh duke festuar fitoren e “Champions Lige”-s nga ekipi i Barcelonës.

“Bossi” i drogës ishte arratisur disa herë nga burgu. Në vitin 2008, ai u arratis nga burgu i Pavias në Itali, me makinën e një të moshuare. Si pasojë, u shkarkua i gjithë personeli i burgut.

Ai i shpëtoi policisë nga duart edhe në Shqipëri. Ai u arrestua në vitin 2006 në hollin e një hoteli në Tiranë me dy pistoleta në brez, por me ndihmën e një punonjësi policie që i la derën hapur, u arratis nga komisariati i Durrësit.

Në tetor të vitit 2011, dy muaj pasi ishte vënë në pranga, ai u arratis nga burgu në Belgjikë, së bashku me një tjetër të dënuar. Për këtë arsye ai është cilësuar edhe si “mbreti” i arratisjeve./ CNA





Lajmet e fundit nga