Javë e përgjakshme/ Krimet që tronditën vendin

23 Gusht 2024, 10:55, Kronika CNA

Gjatë kësaj jave janë shënuar disa ngjarje kriminale që kanë tronditur vendin. Disa vrasje, plagosje si dhe vetëvrasje janë raportuar gjatë këtyre ditëve në media.

Java nisi me një krim në familje në Milot. Mesditën e të hënës, 19 gusht u regjistruan të shtëna me armë zjarri në Milot nga ku mbetën të plagosur 3 persona.

Në sherr u përfshinë 7 persona, 4 të një familjeje dhe 3 të një tjetre. Fillimisht ata janë zënë me mjete të forta dhe më pas konflikti ka degjeneruar në përdorimin e armës.

Policia ka arrestuar dy prej personave të përfshirë në këtë sherr dhe ka shpallur në kërkim një tjetër.

Në po të njëjtën ditë, në 19 gusht të shtëna me armë zjarri u regjistruan në Tiranë në zonën e Komunës së Parisit ku një efektiv policie, Erjon Goxhara plagosi shtetasin Lorenc Kosta.

Sërish krimi ndodhi për motive të dobëta. Autori u vetëdorëzua vetëm ditën dy ditë më parë në polici.

Po ashtu mbrëmjen e 19 gushtit një shtetas amerikan që banonte në zonën e Laprakës dhe ishte pedagog, vrau me litar gruan, dy qentë dhe më pas veten.

Një krim ky që tronditi mbarë opinion publik për shkak të detajeve që prej kohësh i mbante të mbyllur në banesë.

Në po të njëjtën mbrëmje, të 19 gushtit, u regjistruan të shtëna me armë zjarri në Velipojë, ku u vranë dy persona.

Policia njoftoi se për motive të dobëta, shtetasit G.F dhe dhe E.F vëllezër kanë qëlluar me armë zjarri shtetasit E.I dhe A.H, të cilët janë dërguar menjëherë në spital por nuk kanë mundur t’u mbijetojnë plagëve të marra dhe kanë ndërruar jetë.

Mëngjesin e së martës, në 20 gusht u raportua një tjetër ngjarje e rëndë rreth orës 03:00, në lagjen Nr. 4 të Korçës.

Shtetasi me iniciale Dh. Gj., rreth 90 vjeç dyshohet se është vetëvrarë me armë gjahu në banesën e tij.

Në po të njëjtën ditë, u zbulua një tjetër ngjarje kriminale në Mirditë në fshatin Lajthizë.

Policia bëri të ditur se 68-vjeçari me iniciale F. R. është qëlluar me armë zjarri, nga dritarja e dhomës ku flinte.

Po në datën 20 gusht u gjet i pajetë në një përrua 72-vjeçari me iniciale F. A. në Memaliaj.

U raportua më vonë se 72-vjeçari ishte vrarë. Nga hetimet rezultoi se i moshuari ishte goditur dy herë në kokë dhe në qafë me mjet prerës dhe më pas ishte hedhur në kanal.

Disa të shtëna me armë u regjistruan mesditën e të mërkurës në fshatin Repisht të Shkodrës.

Të shtënat me armë ishin në drejtim të disa efektivëve të policisë, të cilët po shkonin për të asgjësuar një parcelë kanabisi.

Fatmirësisht nga kjo ngjarje nuk pati të lënduar.

Në 21 gusht, një tjetër plagosje ka ndodhur në vend, në Gjirokastër. Në vendin e quajtur "Ura e Lumit", Gjirokastër, në një servis automjetesh, gjatë një konflikti të çastit për motive të dobëta, shtetasi E. N., 25 vjeç plagosi me thikë shtetasin D. S., 38 vjeç, banues në fshatin Picar, i cili ndodhet në spital, jashtë rrezikut për jetën.

Gjatë javës janë raportuar edhe disa vetëvrasje, rastet më të shumta janë regjistruar në Tiranë.

Rasti më i fundit i plagosjes ndodhi ditën e djeshme në rrethrrotullimin e Teg-ut ku në sherr u përfshinë disa persona dhe mbeti i plagosur një prej tyre, sërish për motive të dobëta.

Kjo është java e përgjakshme me një sërë plagosjesh, vrasjesh dhe vetëvrasjesh, të raportuara dhe njoftuara nga vetë unifromat blu./ CNA