E fundit!

13:47 Live Updates

Karburantet në Shqipëri/ Një krizë besimi mes çmimeve dhe transparencës

Çmimet e karburantit sot dhe roli i sh...

Harta e krimit në Shqipëri/ Qytetet ku veprojnë bandat, të përfshirë biznesmenë të fuqishëm

4 Prill 2024, 15:49, Kronika CNA

Harta e krimit në Shqipëri/ Qytetet ku veprojnë bandat, të

Struktura e Posaçme Kundër Korrupsionit dhe krimit të organizuar publikoi sot raportin për vitin 2023 ku një sektor i dedikohet krimit të organizuar, veçoritë e përgjithshme të grupeve kriminale shqiptare si veprojnë dhe karakteristikat e tyre.

SPAK-u thekson në raport se gjatë vitit 2023, grupet kriminale kanë sofistikuar veprimet e tyre dhe kanë shtrirje ndërkombëtare. Sipas Prokurorisë së Posaçme grupet kriminale zakonisht kanë deri në 15 anëtarë.

"Struktura e këtyre grupeve varet kryesisht nga lloji i aktivitetit kriminal, kohëzgjatja, zona ku veprojnë dhe shtrirja e tyre në tregjet kriminale ndërkombëtare. Nga hetimet e vitit 2023, vihet re se disa nga grupet kriminale të njohura në vend, tashmë tregojnë sa kanë arritur të sofistikojnë veprimet e tyre, kjo dhe si rezultat i përplasjeve me grupet e tjera rivale. Këto grupe janë polikriminale dhe kanë shtrirje edhe në tregjet ndërkombëtare kriminale kryesisht në Amerikën e Jugut, Bashkimin Evropian (BE) dhe Britaninë e Madhe. Prezenca e tyre në Shqipëri, dhe ndikimi në zonat ku ato veprojnë në komunitet vijon të mbetet i konsiderueshëm. Struktura e këtyre grupeve kriminale është hierarkike me ndarje të qarta rolesh, dhe me një numër mesatar anëtaresh prej 10-15 personash. Lidhjet e tyre bazohen në lidhje familjare dhe shoqërore. Pjesa vendimmarrëse bazohet te lidhjet familjare", thuhet në raportin e SPAK-ut.

Në raport nëvizohet se në disa raste kriminelët janë të lidhur me përfaqësues të policisë së shtetit, qoftë në nivel lokal, por dhe qendror, të cilët kanë ndihmuar grupet kriminale kryesisht në dhënien e informacioneve apo ndjekjen e lëvizjeve të kundërshtarëve të tyre.

"Një veçori tjetër është edhe përfshirja e biznesmenëve të fuqishëm kryesisht në nivel lokal, të cilët luajnë rolin e ndërmjetësit kyç, ku përveç marrëdhënieve tregtare, u kanë ofruar këtyre grupeve lidhjet e tyre në policinë e shtetit, organet e drejtësisë dhe administratës publike, kryesisht në dhënien e informacioneve ose kontakteve me të tretët", thuhet në raport.

Nga analiza ka rezultuar se në Tiranë dhe qytete të tjera bregdetare, grupet kriminale kryesisht janë të orientuara më shumë drejt pastrimit të parave. Ndërsa vrasjet kanë ndodhur më shumë në qytete si, Durrës, Fushë-Krujë, Fier, Vlorë, Shkodër dhe Elbasan.

"Analiza e tregjeve kriminale në Shqipëri tregon një realitet për t'u shqetësuar. Nga hetimet e këtij viti, janë evidentuar grupe me aktivitet kriminal në Tiranë, Durrës, Vlorë, Gjirokastër, Fier, Shkodër, Elbasan, Kurbin dhe Fushë-Krujë. Në Tiranë dhe qytete të tjera bregdetare, grupet kriminale kryesisht janë të orientuara më shumë drejt pastrimit të parave. Trafiku i narkotikëve është një problem i dukshëm në rrethet e Durrësit, Vlorës, Gjirokastrës, Fierit dhe Kurbinit. Në disa qytete si, Durrësi, Shkodra, Laçi dhe Fushë-Kruja, është evidentuar korrupsioni i funksionarëve të drejtësisë. Vrasjet dhe vrasjet e mbetura në tentativë janë vënë re më shumë në qytete si, Durrës, Fushë-Krujë, Fier, Vlorë, Shkodër dhe Elbasan. Këto vepra penale janë tregues i një tendence në rritje të dhunës dhe kriminalitetit në këto zona. Në zonën e Fushë-Krujës evidentohen gjithashtu raste të blerjes së armëve dhe lëndëve shpërthyese, por dhe makinave të vjedhura të cilat shërbejnë si mjete për kryerjen e vrasjeve", thuhet në raport./CNA