web counter
LEXO PA REKLAMA!

SHKARKO APP

App Store
Google Play

‘Fast & Furious’ në Rrugën e Kombit/ Kapen shoferët 'e pabindur', policia pezullon 82 leje drejtimi

11 Qershor 2022, 17:50, Kronika CNA
‘Fast & Furious’ në Rrugën e Kombit/ Kapen
Shpejtësia e kapur nga radari

Gjatë paradites së djeshme deri në orët e vona të mbrëmjes, makina inteligjente dhe radari automatik kanë skanuar shpejtësi 100 km/h në rrugën Milot – Rubik, si dhe nga 145 km/h deri në 191 km/h, në Rrugën e Kombit.

Nga kontrollet janë pezulluar 82 leje drejtimi dhe janë marrë 156 masa administrative, për shpejtësi nga 20 deri në 30 km/h mbi normën e lejuar, pa sanksionin plotësues të pezullimit të lejes së drejtimit.

Gjithashtu, gjatë monitorimit janë konstatuar shumë drejtues mjetesh, të cilët, krahas qarkullimit me shpejtësi përdornin aparatin celular gjatë drejtimit të mjetit, si dhe nuk kishin vendosur rripin e sigurimit, konkretisht:

39 drejtues mjetesh, krahas qarkullimit me shpejtësi mbi normën e lejuar, janë ndëshkuar edhe për mosvënie të rripit të sigurimit;

54 drejtues mjetesh, krahas qarkullimit me shpejtësi mbi normën e lejuar, janë ndëshkuar edhe për përdorim të aparatit celular gjatë drejtimit të mjetit, si dhe

35 drejtues janë evidentuar duke i kryer të tria shkeljet njëkohësisht, qarkullim me shpejtësi mbi normën e lejuar, mosvënie të rripit të sigurimit, si dhe përdorim të aparatit celular gjatë drejtimit të mjetit. Masat administrative për këta drejtues mjetesh, kanë variuar nga 30.000 lekë të rinj deri në 100.000 lekë të rinj.

Policia Rrugore apelon për të gjithë përdoruesit e rrugës që të zbatojnë me rigorozitet rregullat e qarkullimit rrugor, pasi Policia Rrugore nuk është në aksion, por është në punë 24/7, vetëm me qëllimin madhor, parandalimin e aksidenteve rrugore.

Policia bën thirrje që të gjithë drejtuesit e mjeteve të tregojnë kujdes që të mos abuzojnë me rregullat e qarkullimit, pasi të gjitha akset rrugore të vendit janë të monitoruara, me makinën inteligjente, flotën e pajisjeve të reja që përdoren nga patrullat e Policisë Rrugore me mjete të paloguara./ B.A. – CNA.al

 





Lajmet e fundit nga