E fundit!

16:50 Aktualitet

Siguroi kushtet për të kryer vrasjen e Hajrullës dhe Matodashajt/ GJKKO shpall dënimin për Erio Zejnon

Gjykata e Posaçme ka dënuar me 7.4 vjet burg Erio Zejnon, ...

Arrestohet 37-vjeçari/ Dyshohet për sulme me armë e tritol

6 Prill 2026, 11:36, Kronika CNA

Një 37-vjeçar me rrezikshmëri të lartë shoqërore është arrestuar nga Policia e Tiranës, pasi dyshohet se po përgatiste një ngjarje kriminale kundër personit dhe pronës, ndërkohë që janë zbardhur edhe dy ngjarje të mëparshme të dyshuara të kryera prej tij.

Arrestimi u bë në kuadër të operacionit policor të koduar “Kontigjenti”, i zhvilluar nga Komisariati i Policisë Nr. 5 në bashkëpunim me Seksionin për Hetimin e Krimeve të Rënda.

Sipas Policisë, i arrestuari, shtetasi me iniciale P. D., banues në Paskuqan, u kap pas një ndjekjeje, pasi nuk iu bind urdhrit për ndalim dhe tentoi të largohej me shpejtësi me një motomjet pa targa, i dyshuar i vjedhur.

Në momentin e ndalimit, pranë liqenit të Paskuqanit, 37-vjeçari kishte vendosur një maskë silikoni.

Gjatë kontrollit fizik dhe në motomjet, Policia gjeti dhe sekuestroi lëndë eksplozive gati për shpërthim, 10 litra lëndë djegëse, një armë zjarri (pistoletë) me municion, si dhe mjetin pa targa.

Nga hetimet paraprake, dyshohet se i arrestuari është autor i dy ngjarjeve kriminale të ndodhura në tetor 2025 në zonën e Paskuqanit.

Konkretisht, më 3 tetor ai dyshohet se ka qëlluar me armë zjarri drejt një banese dhe më pas ka djegur automjetin e përdorur në krim në afërsi të urës së fshatit Tapizë.

Ndërsa më 17 tetor, ai dyshohet se ka hedhur lëndë plasëse në një tjetër banesë, duke shkaktuar vetëm dëme materiale.

Nën drejtimin e Prokurorisë, vijojnë hetimet për zbardhjen e plotë të veprimtarisë kriminale të 37-vjeçarit, identifikimin e bashkëpunëtorëve të mundshëm dhe dokumentimin e ngjarjeve të tjera ku ai mund të jetë i përfshirë.

“Parandalohet një ngjarje e mundshme kriminale kundër personit dhe pronës, si dhe zbardhen 2 të tilla, të kryera nga një shtetas me rrezikshmëri të lartë shoqërore.

Kapet, si rezultat i ndjekjes policore, një 37-vjeçar që kishte siguruar, për qëllime kriminale, lëndë eksplozive, lëndë djegëse, armë zjarri dhe një motomjet të dyshuar të vjedhur, pa targa.

Në momentin e ndalimit, ai kishte vendosur maskë silikoni.

Sekuestrohen sasi lënde eksplozive (gati për shpërthim), 10 litra lëndë djegëse, 1 armë zjarri (pistoletë) me municion, 1 maskë silikoni dhe 1 motomjet pa targa (i dyshuar i vjedhur).

Si rezultat i vigjilencës së shtuar të shërbimeve të Policisë së Tiranës, për garantimin e sigurisë së qytetarëve, si dhe falë intensifikimit të kontrolleve dhe administrimit të informacioneve në rrugë operative, shërbimet e Komisariatit të Policisë Nr. 5, në bashkëpunim me specialistët e Seksionit për Hetimin e Krimeve të Rënda, finalizuan operacionin policor të koduar “Kontigjenti”.

Gjatë operacionit, i është bërë shenjë ndalimi motomjetit pa targa, me të cilin lëvizte shtetasi P. D., 37 vjeç, banues në Paskuqan.

37-vjeçari nuk i është bindur urdhrit të Policisë, por ka vijuar lëvizjen me shpejtësi, me motomjet.

Si rezultat i ndjekjes policore, është bërë kapja dhe arrestimi i tij, në afërsi të liqenit të Paskuqanit.

Në momentin e ndalimit, është konstatuar se 37-vjeçari kishte vendosur maskë silikoni dhe gjatë kontrollit fizik dhe në motomjet, shërbimet e Policisë i gjetën sasi lënde eksplozive, gati për shpërthim, 10 litra lëndë djegëse dhe 1 armë zjarri (pistoletë) me municion.

Nga hetimet e mëtejshme dyshohet se shtetasi i arrestuar, P. D, më datë 03.10.2025, në rrugën “Besim Cera”, Paskuqan 1, ka qëlluar me armë zjarri në drejtim të banesës së shtetasit Q. K., dhe më pas ka djegur automjetin e përdorur gjatë kryerjes së krimit, në afërsi të urës së fshatit Tapizë, si dhe më datë 17.10.2025, në rrugën “Unaza e Madhe”, Paskuqan 2, ka hedhur një sasi lënde plasëse në banesën e shtetasit Rr. D., ngjarje nga e cila janë shkaktuar vetëm dëme materiale.

Më tej, dyshohet se motomjeti me të cilin 37-vjeçari u konstatua duke lëvizur gjatë natës, në rrugën “Mustafa Lita”, është i vjedhur.

Nën drejtimin e Prokurorisë, vijon puna intensive për identifikimin dhe kapjen e bashkëpunëtorëve të mundshëm të 37-vjeçarit, si dhe për zbardhjen e ngjarjeve të tjera kriminale në të cilat mund të jetë përfshirë ai”, njofton policia./ CNA