web counter
LEXO PA REKLAMA!

SHKARKO APP

App Store
Google Play

Zyrtarët amerikanë në “kontakt direkt” me rebelët e grupit HTS

15 Dhjetor 2024, 14:59, Kosova & Bota CNA

Zyrtarët amerikanë në “kontakt direkt” me

Shtetet e Bashkuara janë në “kontakt direkt” me rebelët e grupit Tahrir al-Sham (HTS), që tani kontrollon Sirinë, pas rrëzimit të regjimit të liderit Bashar al-Assad, ka thënë Sekretari amerikan i Shtetit, Antony Blinken.

Kjo është hera e parë që SHBA-ja ka konfirmuar kontaktin me këtë grup, të cilin e konsideron organizatë terroriste.

Blinken u ka thënë gazetarëve se SHBA-ja ka qenë në kontakt për të kuptuar për fatin e gazetarit të zhdukur, Austin Tice.

Ai i ka bërë këto deklarata në Jordani, pas bisedimeve që ka zhvilluar me përfaqësues të disa vendeve arabe, Turqisë dhe Evropës, për të diskutuar të ardhmen e Sirisë.

Zyrtarët janë pajtuar për të mbështetur një tranzicion paqësor në këtë shtet.

Vetë zyrtarë të Jordanisë kanë thënë se fuqitë rajonale nuk dëshirojnë të shohin kaos.

Në një komunikatë të përbashkët, këto vende kanë bërë thirrje për një Qeveri siriane gjithëpërfshirëse që respekton të drejtat e minoriteteve dhe nuk ofron bazë për “grupet terroriste”.

Përfaqësues të grupit HTS nuk kanë qenë pjesë e takimit në Jordani. HTS, grupi më i fuqishëm i rebelëve në Siri, ishte themeluar nën një emër tjetër, Jabhat al-Nusra, më 2011, dhe ka qenë degë e Al-Kaidës.

Grupi është konsideruar ndër më efektivët në luftën kundër regjimit të Assadit.

Përveç nga SHBA-ja, grupi konsiderohet terrorist edhe nga Kombet e Bashkuara, Turqia dhe Bashkimi Evropian.

Lideri i grupit, Ahmed al-Sharaa, që njihet edhe si Abu Mohammed al-Jolani, i ka shkëputur lidhjet me Al-Kaidën më 2016. Ai është zotuar së fundmi për tolerancë për komunitetet dhe grupet tjera fetare. Megjithatë, e kaluara e dhunshme e grupit ka ngritur shumë pikëpyetje nëse ai do të mund t’i përmbushë premtimet.

Regjimi brutal i Assadit është rrëzuar pasi gati 14 vjetësh luftë civile, si pasojë e së cilës janë vrarë mbi 500.000 njerëz dhe janë zhvendosur miliona tjerë.

Assadi dhe familja e tij janë në Rusi, pas azilit që u është miratuar direkt prej presidentit rus, Vladimir Putin./ Rel





Lajmet e fundit nga