Zelensky: Rusia ka mbledhur mbi 50.000 trupa për një ofensivë në verilindje të Ukrainës

28 Maj 2025, 14:12, Kosova & Bota CNA

Zelensky: Rusia ka mbledhur mbi 50.000 trupa për një ofensivë

Rusia i ka grumbulluar më shumë se 50.000 trupa - përfshirë disa nga forcat e saj të stërvitura më së miri - pranë rajonit verilindor të Sumit në Ukrainë, tha presidenti ukrainas, Volodymyr Zelensky.

Megjithatë, Zelensky theksoi se Kievi ka ndërmarrë masa për ta parandaluar ushtrinë ruse të kryejë një ofensivë të madhe me këta trupa.

Grumbullimi i trupave ndodh në një kohë kur Rusia duket se po përgatitet për një ofensivë verore në Ukrainë, pavarësisht se Kievi pret nga ajo ta paraqesë një memorandum me kushtet e saj për t’i vazhduar bisedimet për armëpushim.

Sumi shtrihet përgjatë rajonit rus të Kurskut, ku Ukraina më parë kishte pushtuar dhe mbajtur një pjesë të territorit rus për disa muaj, para se të tërhiqej pothuajse tërësisht muajin e kaluar, edhe pse Kievi thotë se ende mban disa zona të vogla atje.

"Forcat e tyre më të mëdha, më të forta ndodhen tani në frontin e Kurskut", tha Zelensky për gazetarë.

"Qëllimi i tyre është t’i largojnë trupat tona nga rajoni i Kurskut dhe të përgatiten për ofensivë ndaj rajonit të Sumit", shtoi ai.

Putin-i ka thënë se dëshiron ta krijojë një "zonë të sigurisë" përgjatë kufirit të Rusisë me Ukrainën.

Zelensky tha se beson që Rusia synon t’i marrë rreth 10 kilometra territor thellë brenda Ukrainës.

Rusia ka kapur së paku katër fshatra kufitare në rajon kohët e fundit dhe ka përparuar ngadalë gjatë javëve të fundit në disa pjesë të vijës së frontit në Ukrainën lindore pranë qytetit Kostiantinivka.

Megjithatë, presidenti ukrainas tha se rusët janë zmbrapsur nga ajo zonë me rreth 4 kilometra gjatë dy ditëve të fundit.

Zelensky tha në një konferencë për shtyp se qeveria e tij është e gatshme për bisedime të mëtejshme për paqe në çdo format. Ai tha se raundi i ardhshëm pritet të zhvillohet në nivel teknik, por ai vetë është i gatshëm për një takim trepalësh me presidentin amerikan, Donald Trump, dhe presidentin rus, Vladimir Putin.

Ai shtoi se nuk dëshiron që Shtetet e Bashkuara të largohen nga procesi i paqes për Ukrainën, siç kanë kërcënuar të bëjnë nëse nuk arrihet përparim.

Ukraina dhe Rusia këmbyen nga 1.000 të burgosur secila pas një takimi të delegacioneve të dy vendeve në Stamboll gati dy javë më parë, i cili nuk solli armëpushim, që kërkohej nga Ukraina, SHBA-ja dhe Europa.

Zelensky tha se i sheh Turqinë, Vatikanin dhe Zvicrën si vendet më të mundshme për negociata të mëtejshme me Rusinë.

Ai theksoi se Rusia ka sugjeruar që bisedimet të zhvillohen në Bjellorusi – një propozim që Kievi e konsideron të pasinqertë dhe të pamundur, pasi trupat ruse përdorën këtë vend si trampolinë për pushtimin e Ukrainës në vitin 2022./ REL