Ish-deputeti i Kosovës ndalohet nga autoritetet serbe/ Kurti: Serbia s'do e as nuk synon marrëdhënie normale

27 Maj 2025, 07:20, Kosova & Bota CNA

Ish-deputeti i Kosovës ndalohet nga autoritetet serbe/ Kurti: Serbia

Ish-deputeti i Kosovës, Gramos Agusholli, është ndaluar nga autoritetet serbe në pikën kufitare të Merdarës. Lajmi bëhet i ditur nga vetë Agusholli me anë të një statusi në rrjetet sociale.

Në statusin e tij ish-deputeti shkruan se u ndalua në pikën kufitare, ndërkohë që ishte duke shkuar drejt Sllovenisë dhe është përballur me një situatë tensionuese. Më tej, Agusholli falënderon Ministrinë e Jashtme, kryeminsitrin Kurti dhe të gjithë personat që u përfshinë në çështjen e lirimit të tij.

“Sot, gjatë rrugës për në Lubjanë të Sllovenisë, u ndalova nga autoritetet serbe në pikën kufitare të Merdarës.

Ndalesë e papritur, pa asnjë arsye të qartë dhe aspak e lehtë sidomos kur udhëton me familjar dhe përballesh me tension të panevojshëm. Dua të ju njoftoj se tani jemi mirë dhe kemi vazhduar rrugën tonë, por nuk mund të them që kjo përvojë ishte e lehtë! Të përballesh me këtë realitet, edhe në vitin 2025, është e dhimbshme dhe zhgënjyese. Faleminderit nga zemra të gjithëve ju që u shqetësuat, që më keni shkruar, që keni kontaktuar edhe familjen time. Një falënderim i veçantë për Ministrinë e Punëve të Jashtme dhe Diasporës, zyrën ndërlidhëse të Kosovës në Beograd, Kryeministrin Albin Kurti, si dhe të gjithë atyre që u angazhuan dhe kontribuan në lirimin tim”, shkruan ish-deputeti.

Një reagim për këtë ka ardhur edhe nga kryeministri Albin Kurti, i cili në një status në rrjetet sociale shkruan se kjo dëshmon që Serbia nuk do marrëdhënie normale me fqinjin e saj.

Më tej Kurti shkruan se veprime të tilla kanë qëllim frikësimin e qytetarëve të Kosovës dhe kërkon dënim të këtyre veprave nga ndërkombëtarët.

“Serbia nuk lëshon rast për ta dëshmuar se nuk do e as synon marrëdhënie normale e fqinjësore. Ndalimi i ish-deputetit të Kuvendit të Kosovës, Gramos Agushollit nga autoritetet e shtetit serb në pikën kufitare në Merdarë për orë të tëra është prova e radhës. Praktika të tilla që përdoren në vazhdimësi me qëllim keqtrajtimin dhe frikësimin e qytetarëve tanë duhet të dënohen zëshëm dhe njëzëri edhe nga komuniteti ndërkombëtar.

Përgëzoj institucionet tona dhe shtetet partnere për reagimin e shpejtë dhe të suksesshëm. Gramosit i dëshiroj qëndrim të mbarë në Lubjanë”, shkruan Kurti./ CNA