web counter
LEXO PA REKLAMA!

SHKARKO APP

App Store
Google Play

Vrasja e trefishtë në Gjilan/ Presidentja Osmani: Organet e rendit dhe drejtësisë në veprim urgjent

10 Gusht 2025, 22:16, Kosova & Bota CNA

Vrasja e trefishtë në Gjilan/ Presidentja Osmani: Organet e rendit dhe

Presidentja e Kosovës, Vjosa Osmani ka reaguar këtë mbrëmje lidhur me ngjarjen e rëndë të së dielës në Gjilan, ku tre persona humbën jetën nga të shtënat me armë zjarri, ndërsa një person tjetër u plagos.

Përmes një njoftimi nga Presidenca, Osmani shpreh keqardhjen e thellë për humbjen tragjike të tre qytetarëve në vrasjen e rëndë të kryer në Gjilan dhe përcjell ngushëllimet më të sinqerta për familjet e viktimave.

Gjithashtu, Presidentja kërkon nga organet kompetente që autorët e këtij akti makabër të kapen sa më shpejt dhe të dalin para drejtësisë, për t’u përballur me përgjegjësinë e plotë ligjore.

“Është për keqardhje që vitin e kaluar të njëjtit ishin lënë të lirë nga institucionet e drejtësisë, pas një kohe të shkurtër të kaluar në paraburgim, përkundër veprave të rënda për të cilat akuzoheshin. Është po ashtu shqetësues manipulimi me qëllim të keqinformimit të opinionit publik, duke përdorur fotografi të rastit të bëra në ambiente publike që autori i këtyre veprave i kishte bërë me një sërë figurash publike. Nga një hulumtim i thjeshtë del se këto fotografi janë bërë gjatë një organizimi festiv të Ambasadës së Republikës së Shqipërisë në Kosovë, me rastin e një aktiviteti publik ku morën pjesë edhe përfaqësues të tjerë institucionalë, personalitete nga politika, të ftuar të tjerë dhe qytetarë. Brenda vitit, Presidentja del në fotografi me mijëra qytetarë e pjesëmarrës në aktivitete publike, të cilët as nuk i njeh e as nuk mund ta dijë se cila është veprimtaria e tyre. Prandaj, aludimet për kinse “shoqërim” janë asgjë tjetër pos shpifje”,-shprehet Osmani./CNA

 





Lajmet e fundit nga