E fundit!

12:44 Politikë

Skana gozhdon Gjonin: Deputeti part time që i qan zemra për Mirditën, po deformon realitetin

Zëvendësministrja e Mbrojtjes, Pranvera Skana, i është për...

Urdhri i ri i Trump-it/ Shtetet që i ndalojnë padrejtësisht amerikanët janë sponsore të terrorizmit

6 Shtator 2025, 10:39, Kosova & Bota CNA

Urdhri i ri i Trump-it/ Shtetet që i ndalojnë padrejtësisht

Presidenti amerikan, Donald Trump, e ka nënshkruar një urdhër ekzekutiv që parasheh shpalljen e shteteve që ndalojnë padrejtësisht shtetas amerikanë, si sponsore shtetërore të terrorizmit, përfshirë Iranin, Afganistanin, Rusinë dhe Kinën.

Zyrtarë të lartë të administratës kanë thënë para gazetarëve më 5 shtator se Uashingtoni do t’i shënjestrojë shtetet që mbajnë padrejtësisht amerikanë, si dhe ata që përfshihen në “diplomaci pengjesh”.

“Sikurse me listën e sponsorëve shtetërorë të terrorizmit, asnjë shtet nuk do të ketë dëshirë të përfundojë në këtë listë”, ka thënë Sekretari amerikan i Shtetit, Marco Rubio, përmes një deklarate.

Urdhri parasheh masa të ashpra, përfshirë sanksionet, ndaj shteteve që Uashingtoni beson se po mbajnë gabimisht amerikanë.

Një zyrtar tjetër i lartë i administratës amerikane u ka thënë gazetarëve se masat ndëshkuese do të jenë të ngjashme me ato që vendosen ndaj organizatave që shpallen terroriste.

“Sot ndryshon gjithçka sa u përket regjimeve mashtruese dhe regjimeve që mendojnë se amerikanët mund të trajtohen si pengje”, ka thënë një zyrtar tjetër i administratës, në kushte anonimiteti.

Administrata amerikane ka thënë se ka siguruar lirimin e 72 shtetasve amerikanë, përfshirë prej vendeve sikurse Rusia dhe Afganistani.

“Kemi nxjerrë shumë njerëz dhe do të vazhdojmë”, ka thënë presidenti amerikan, Donald Trump, më 5 shtator.

Sipas politikës së re, Uashingtoni do t’i paralajmërojë shtetet që mund të futen në listën e re dhe ato do të kenë një periudhë kohore që të veprojnë para se të vendosen sanksionet.

Zyrtarët amerikanë kanë thënë se besojnë që Rusia është duke mbajtur padrejtësisht 9 amerikanë, ndërsa Irani 8.

Rusia është nën sanksione të tjera amerikane dhe europiane lidhur me nisjen e luftës së Rusisë në Ukrainë, në shkurt të vitit 2022.

Irani është shpallur shtet sponsor i terrorizmit nga Shtetet e Bashkuara dhe është nën sanksione amerikane.

Organizatat që lobojnë për lirimin e shtetasve amerikanë, që mbahen si pengje apo burgosen nëpër botë, e kanë mirëpritur vendimin e administratës Trump./ Rel