E fundit!

10:45 Kronika

Vrau efektivin e policisë dhe plagosi një tjetër/ Kush është autori i ngjarjes në Maliq

Një ngjarje e rëndë u shënua këtë të enjte në Lozhan të Ma...

Talebanët afganë festojnë dyvjetorin e kthimit në pushtet

15 Gusht 2023, 15:24, Kosova & Bota CNA

Talebanët e kanë shënuar përvjetorin e dytë të kthimit në pushtet në Afganistan, duke festuar në Kabul, prej ku kanë pretenduar se e kanë kthyer sigurinë në gjithë shtetin sipas sistemit islamik.

Teksa forcat e huaja, të udhëhequra nga Shtetet e Bashkuara janë përgatitur për t’u tërhequr nga Afganistani, talebanët kanë hyrë në kryeqytetin afgan më 15 gusht 2021, veprim që ka rezultuar me shpërbërje të ushtrisë afgane dhe ikje të presidentit të atëhershem Ashraf Ghani nga shteti.

“Në përvjetorin e dytë të marrjes së Kabulit, ne dëshirojmë të përgëzojmë kombin tonë muxhahid të Afganistanit dhe kërkojmë të falënderoni Allahun për këtë fitore të madhe”, ka thënë zëdhënësi i talebanëve Zabihullah Mujahid, përmes një deklarate.

Ai ka pretenduar se Afganistani është duke e shijuar paqen që nuk është përjetuar me dekada, mirëpo Kombet e Bashkuara kanë thënë se kanë regjistruar dhjetëra sulme ndaj civilëve – disa besohet se janë kryer nga rivalët e talebanëve brenda shtetit.

Për shumë gra, të cilat kanë gëzuar shumë liri përgjatë dy dekadave të prezencës së forcave perëndimore në këtë shtet, kthimi i talebanëve në pushtet ka qenë goditje e madhe.

“Janë bërë dy vjet prej kur talebanët janë kthyer në Afganistan. Dy vjet prej kur është përmbysur jeta e grave dhe vajzave, të drejtat dhe e ardhmja e tyre”, ka thënë Amina Mohammed, zëvendëssekretare e përgjithshme e Kombeve të Bashkuara, përmes një deklarate.

Masat e sigurisë kanë qenë të ashpra të martën në Kabul, ditë e shpallur festë kombëtare.

Luftëtarët talebanë, mbështetësit dhe disa banorë të Kabulit, janë mbledhur nëpër rrugë dhe kanë ecur me makina ngadalë.

“Sot kam ardhur për të festuar përvjetorin e dytë të talebanëve. Ka qenë dita kur armiku i Afganistanit është dëbuar nga shteti ynë, prandaj kam ardhur të festoj”, ka thënë banori Sayed Hashmatullah Sadat.

Fillimisht talebanët kanë tentuar t’i sigurojnë afganët dhe komunitetin ndërkombëtar se janë moderuar, dhe janë zotuar se do t’i respektojnë të drejtat e njeriut dhe shtypit.

Mirëpo, dy vjet pas kthimit në pushtet dhe rrëzimit të Qeverisë afgane të mbështetur nga Perëndimi, islamistët e linjës së ashpër kanë dështuar që t’i zbatojnë premtimet e tyre dhe vazhdimisht i kanë kufizuar liritë e grave, i kanë shtypur zërat kundërshtues dhe kanë prezantuar forma brutale për ta vënë drejtësinë në vend./ REL