Sot mbahen takimet në kuadër të dialogut Kosovë-Serbi

17 Dhjetor 2024, 09:12, Kosova & Bota CNA

Sot mbahen takimet në kuadër të dialogut Kosovë-Serbi

Kryenegociatori në dialogun Kosovë-Serbi nga Kosova, Besnik Bislimi, përfaqësuesi i posaçëm i BE-së për dialog Miroslav Lajçak dhe kryenegociatori serb, Petar Petkoviq

Takimet në kuadër të dialogut mes Kosovës dhe Serbisë, të cilin e lehtëson Bashkimi Europian do të zhvillohen sot në Bruksel.

Siç kishte konfirmuar më herët BE-ja, këto takime do të jenë në nivel të kryenegociatorëve.

Sikur edhe herave të mëparshme së pari pritet të ketë takime bilaterale të Përfaqësuesit të Posaçëm të BE-së për dialog, Miroslav Lajçak me shefin e delegacionit të Kosovës Besnik Bislimi, pastaj me atë të Serbisë, Petar Petkoviq.

Më vonë, nëse do të ketë gatishmëri të palëve, do të ketë edhe takim të përbashkët trepalësh.

Sipas burimeve nga Bashkimi Europian, në këto takime do të shqyrtohen një varg çështjesh, përfshirë edhe implementimin e Marrëveshjes për rrugën drejt normalizimit.

Takimi i fundit në këtë nivel në kuadër të dialogut të lehtësuar nga BE-ja është zhvilluar me 23 tetor në Bruksel. Prej atëherë nuk ka pasur takime tjera.

Sipas burimeve diplomatike të BE-së, Lajçak u ka raportuar ndërkohë përfaqësuesve të vendeve anëtare për gjendjen e dialogut dhe ka thënë se palët kanë treguar mungesë të qartë të gatishmërisë dhe vullnetit për të bërë ndonjë progres në zbatimin e marrëveshjes për rrugën drejt normalizimit të raporteve.

Ndërkohë, Përfaqësuesja e Lartë e BE-së për Politikë të Jashtme dhe Siguri, Kaja Kallas ka shprehur gatishmërinë që të angazhohet aktivisht në procesin e dialogut.

Mandati i të dërguarit të posaçëm për dialog, Miroslav Lajçak, i vazhduar disa herë, do të përfundojë në fund të muajit janar të vitit që vjen.

Ndërkohë pritet që Kaja Kallas, në bashkëpunim me vendet anëtare, të vendosë lidhur me vazhdimin e dialogut, përfshirë edhe rreth asaj se a do të ketë pasardhës të Lajçakut në atë pozitë dhe kush do të jetë ai.

Bashkimi Europian do të përsërisë sot thirrjen për Kosovën dhe për Serbinë që "pa vonesa dhe pa parakushte të zbatojnë Marrëveshjen për rrugën drejt normalizim it të raporteve dhe aneksin për zbatimin e saj, sikur edhe të gjitha obligimet tjera që kanë dalur nga procesi i dialogut".

Për Kosovën do të përsëritet thirrja që pa vonesa të nisë procesin e themelimit të Asociacionit të Komunave me shumicë Serbe ndërsa për Serbinë të nisë procesin për njohjen e dokumenteve dhe simboleve të Kosovës.

Kosova dhe Serbia do të rikujtohen se përparimi në procesin e normalizimit të raporteve do të vazhdojë të jetë kusht edhe për rrugëtimin e tyre në procesin e integrimit në BE. Këto thirrje pritet të jenë në konkluzat për zgjerim që do të miratohen të martën në takimin e Këshillit të çështjeve të përgjithshme të BE-së./REL