web counter
LEXO PA REKLAMA!

SHKARKO APP

App Store
Google Play

E fundit!

x

Skandali i Mogherini-t, një tjetër goditje për BE-në pas "Qatargate"/ Rusia nuk humbet rastin për të thumbuar unionin

3 Dhjetor 2025, 08:02, Kosova & Bota CNA

Skandali i Mogherini-t, një tjetër goditje për BE-në pas

Dëmi moral dhe simbolik, ose, më saktë, politik, i shkaktuar Bashkimit Europian nga skandali ku u përfshi ish-nënkryetarja e Komisionit Federica Mogherini, është tashmë i madh. Ky është skandali i dytë më i madh pas “Qatar Gate” në vitin 2022.

Rusia ndërkohë, nuk ka humbur rastin për të thumbuar dhe sulmuar unionin. Moska e sheh këtë skandal si një fitore në aspektin e përshtypjeve dhe në kontekstin e “Luftës së Ftohtë” që ka qenë duke u zhvilluar mes Rusisë dhe BE-së, kohët e fundit.

"Bashkimi Europian mbyll sytë ndaj korrupsionit të vet, por nuk ndalet së predikuari të tjerëve. Miliona euro janë kanalizuar në Ukrainë përmes kanaleve të korrupsionit, diçka që ka ndodhur prej vitesh dhe në sy të publikut”, u shpreh zëdhënësja e Ministrisë së Jashtme ruse, Maria Zakharova, në një deklaratë.

Ditën e djeshme autoritet kompetente belge, në kuadër të luftës kundër korrupsionit kryen një bastisje në shërbimin diplomatik të BE-së ku u arrestua ish-Përfaqësuesja e Lartë italiane e Bashkimit Europian për Punët e Jashtme dhe Politikën e Sigurisë, Federica Mogherini.

Ajo po mbahet si e dyshuar për kryerjen e një zinxhiri veprimesh të paligjshme, të cilat përfshijnë mashtrim dhe lidhen me menaxhimin e fondeve të Bashkimit Europian për arsimimin dhe trajnimin e diplomatëve të rinj.

Federica Mogherini, 52 vjeç, ka qenë drejtoreshë e Kolegjit të Europës që nga viti 2020, duke mbajtur titullin rektore. Përveç Kolegjit, hetimi përqendrohet edhe në mashtrime të mundshme në Shërbimin Europian të Veprimit të Jashtëm (EEAS), drejtoreshë e të cilit Mogherini shërbeu nga viti 2014 deri në vitin 2019.

Bashkë me Mogherinin, u arrestua edhe një zyrtar tjetër italian i Komisionit Europian, Stefano Sannino. Ai shërbeu si Sekretar i Përgjithshëm i Shërbimit Europian të Veprimit të Jashtëm. Sannino është gjithashtu i përfshirë në Akademinë Diplomatike, e cila ishte arsyeja për arrestimet e zyrtarëve të lartë të BE-së.

Personi i tretë i ndaluar në Belgjikë është një tjetër italian, Cesare Cegretti, gjithashtu drejtor i Kolegjit të Europës. Asnjë deklaratë nuk është bërë ende nga ana e Komisionit Europian, gjë që është logjike, pasi gjëja e fundit që Ursula von der Leyen kishte nevojë në rrethanat aktuale, jashtëzakonisht të vështira, për shkak të tensionit me Rusinë, thashethemeve për luftë të afërt, ishte një skandal i ri.

Veprat penale për të cilat po hetohet Federica Mogherini dyshohet se janë kryer në periudhën 2021-2022 dhe, sipas asaj që është bërë publike nga Zyra e Prokurorit Publik Europian, akuzat që do të ngrihen kundër tre të ndaluarve përfshijnë mashtrim në ndarjen e fondeve publike, korrupsion, shkelje të detyrës dhe sekretit profesional.

Gjithashtu vihet re se Prokurori ka dyshime serioze se ka pasur shkelje të Nenit 169 të Rregullores Financiare të BE-së, që ka të bëjë me mbrojtjen e konkurrencës së shëndetshme. Informacion konfidencial iu zbulua njërit prej kandidatëve studentë në Akademinë Diplomatike dhe Kolegjin e Europës.

Federica Mogherini, ish-ministrja e Jashtme italiane në vitin 2014, e martuar dhe nënë e dy fëmijëve, si dhe dy bashkëpunëtorët e saj të dyshuar, nuk janë akuzuar zyrtarisht. Meqenëse autoritetet belge kanë 48 orë për të planifikuar hapat e tyre të mëtejshëm, kjo periudhë paraburgimi mund të zgjatet nëse prokurori kompetent e konsideron të nevojshme.

Në orët në vijim, ndoshta do të zbulohen gjithnjë e më shumë detaje specifike rreth shumës së fondeve që Federica Mogherini dhe dy bashkëpunëtorët e saj dyshohet se i kanë keqmenaxhuar. /CNA





Lajmet e fundit nga