Shtohen shqetësimet për zgjerimin e konfliktit në Lindjen e Mesme

22 Tetor 2023, 17:06, Kosova & Bota CNA

Shqetësimet rreth rrezikut të zgjerimit të luftës mes Izraelit dhe Hamasit në një konflikt më të gjerë në Lindjen e Mesme po rriten, ndërsa Izraeli goditi sërish Gazën dhe mbështetësit e Hamasit në Liban dhe Siri. Forcat ushtarake izraelite që sërish përmenden përgatitjet për një sulm tokësor në Gazë, njoftuan se kanë intensifikuar sulmet në enklavën që kontrollohet nga Hamasi. Sot (Të dielën), forcat izraelite sulmuan një hapësirë nën një xhami e cila sipas tyre përdorej nga militantët islamikë për sulme kundër Izraelit. Ndërkohë Shtetet e Bashkuara dërguan sisteme shtesë ushtarake në rajon.

Izraeli vazhdoi sulmet ajrore në Gaza, përfshirë goditjen e një kompleksi nën një xhami që sipas ushtrisë izraelite tha se po përdorej nga militantët për të organizuar sulme.

Shërbimi i ambulancës së Gjysmëhënës së Kuqe Palestineze tha se të paktën një palestinez u vra dhe tre të tjerë u plagosën.

“Si rezultat i sulmeve të intensifikuara dhe informacioneve të sakta që kemi, dhjetëra terroristë u vranë në qytetin e Gazës dhe rrethinën e tij. Përveç kësaj, u vra edhe zëvendës shefi i forcës së raketave të Hamasit”, tha zëdhënësi i ushtrisë izraelite ndërsa shtoi thirrjet për civilët në Gazë që të vazhdojnë evakuimin drejtë kufirit jugor me Egjiptin.

“I bëj thirrje pjesës tjetër të banorëve: shkoni në jug. Hamasi po ju përdor. Po ju përdor si mburojë njerëzore. Lëvizni në jug ku po krijohen kushtet që t’ju ofrojmë ato për të cilat keni nevojë”.

Kjo deklaratë duket të jetë reagim ndaj asaj që një ditë më parë e tha presidenti palestinez, Mahmoud Bass në Kajro.

“Ne paralajmërojmë kundër çdo përpjekjeje për të zhvendosur popullin tonë nga Gaza dhe gjithashtu paralajmërojmë kundër çdo përpjekjeje për të dëbuar palestinezët nga shtëpitë e tyre ose për t'i zhvendosur ata nga Jeruzalemi ose Bregu Perëndimor, sepse ne nuk do të pranojmë zhvendosje dhe do të qëndrojmë të palëkundur pa marrë parasysh sfidat”, tha presidenti i Autoritetit Palestinez dhe shtoi:

“Zonja dhe zotërinj, ne nuk do të largohemi, nuk do të ikim dhe do të mbetemi në tokën tonë”.

Intensifikimi i luftimeve ndërkaq ka forcuar edhe më shqetësimet për përshkallëzimin e situatës në gjithë Lindjen e Mesme.

Raketat izraelite goditën aeroportet ndërkombëtare në Alepo dhe Damask të Sirisë, vend ku përkrahësi kryesor i Hamasit, Irani ka prani ushtarake.

Përgjatë kufirit verior të Izraelit me Libanin, ushtria izraelite tha se goditi disa objektiva të Hezbollahut gjatë natës. Hezbollahu i mbështetur nga Irani është përleshur gjithnjë e më shumë me forcat izraelite në mbështetje të Hamasit.

Në një shenjë tjetër të rritjes së rrezikut në veri, Izraeli zgjeroi zonën e evakuimeve në komunitetet në kufi me Libanin.

Përgjatë kufirit me Libanin pati edhe incidente të tjera, ndërsa kryeministri izraelit Benjamin Netanyahu, i cili vizitoi trupat ushtarake afër kufirit verior, e bëri të qartë se çfarë mund të ndodhë në rast të përfshirjes së Hezbollahut në luftë me Izraelin.

“Nuk mund t'ju them tani nëse Hezbollahu ka vendosur të hyjë plotësisht në luftë. Nëse kjo ndodhë, ata do të bëjnë gabimin më të madh të jetës së tyre dhe ne do t'i godasim me një forcë të paimagjinueshme. Kjo do të thotë shkatërrim për ta dhe shtetin e Libanit”, tha kryeministri Netanyahu.

Sekretari amerikan i Mbrojtjes, Lloyd Austin tha se Uashingtoni do të dërgojë sisteme të tjera ushtarake në Lindjen e Mesme në mbështetje të Izraelit dhe do të forcojë pozicionin e mbrojtjes së SHBA-së në rajon pas “përshkallëzimeve të fundit nga Irani dhe aleatët e tij” - një referencë për Hezbollahun dhe militantët islamikë palestinezë.

Një autokolonë e dytë kamionësh me ndihma hyri në anën egjiptiane të pikës kufitare me Gazën, sipas burimeve egjiptiane të sigurisë dhe humanitare në Rafah.

19 kamionë që transportonin furnizime mjekësore dhe ushqimore ishin inspektuar nga agjencia e OKB-së për refugjatët palestinezë, thanë burimet

Autokolona e parë prej 20 kamionësh me furnizime shumë të nevojshme hyri në Gazë të shtunën./ VOA