E fundit!

16:32 Politikë

Rama takon sot banorët e Zvërnecit/ Zbardhen detaje

Kryeministri Edi Rama do të zhvillojë ditën e sotme një ta...

Detaje nga shpërthimet e reja në Liban, këtë radhë radiot e dorës të Hezbollahut

18 Shtator 2024, 22:01, Kosova & Bota CNA

Detaje nga shpërthimet e reja në Liban, këtë radhë

Radiot e dorës që përdoren për komunikim nga organizata Hezbollah shpërthyen pasditen e së mërkurës në pjesën jugore të Libanit dhe në rrethinat e Bejrutit. Kjo shton më tej tensionet me Izraelin, pasi vetëm një ditë më parë pati shpërthime të ngjashme të pajisjeve portative që përdor kjo organizatë për t’u dërguar mesazhe të shkruara anëtarëve të saj.

Të paktën një nga shpërthimet ndodhi pranë një funerali të organizuar nga Hezbollahu, organizatë që mbështetet nga Irani, për personat e vrarë një ditë më parë, kur mijëra pajisje shpërthyen në mbarë vendin duke lënë edhe shumë të plagosur në radhët e luftëtarëve të kësaj organizate.

Organizata, e cila për një kohë të shkurtër kaloi në situatë kaotike nga shpërthimet e djeshme, tha të mërkurën se kishte sulmuar pozicionet e artilerisë izraelite me raketa, në goditjen e parë që kur shpërthimet plagosën mijëra anëtarë të organizatës në Liban dhe ngritën perspektivën e një lufte më të gjerë në Lindjen e Mesme.

Radiot e dorës ishin blerë nga organizata Hezbollah pesë muaj më parë, afërsisht në të njëjtën kohë kur ishin blerë edhe pajisjet e tjera të komunikimit, tha një zyrtar nga strukturat e sigurisë.

Agjencia izraelite e zbulimit Mossad, e cila ka një historik të gjatë operacionesh të sofistikuara jashtë vendit, vendosi eksplozivë brenda pajisjeve të importuara nga Hezbollahu, disa muaj përpara shpërthimeve të së martës, tha një zyrtar i lartë libanez i sigurisë, si dhe një tjetër person për agjencinë e lajmeve Reuters.

Numri i të vdekurve u rrit në 12, përfshirë dy fëmijë, tha të mërkurën ministri libanez i Shëndetësisë, Firass Abiad. Sulmi i së martës plagosi rreth 3,000 persona, përfshirë shumë luftëtarë të grupit militant, si dhe ambasadorin e Iranit në Bejrut.

Hezbollahu është zotuar të hakmerret kundër Izraelit, ushtria e të cilit nuk pranoi të komentojë mbi shpërthimet. Palët janë përfshirë në shkëmbime zjarri ndërkufitare që nga shpërthimi i konfliktit në Gazë tetorin e kaluar, duke nxitur frikën për një konflikt më të gjerë në Lindjen e Mesme./VOA