web counter
LEXO PA REKLAMA!

SHKARKO APP

App Store
Google Play

Mbyllen pa sukses bisedimet Kosovë-Serbi në Bruksel

17 Shtator 2024, 20:24, Kosova & Bota CNA

Mbyllen pa sukses bisedimet Kosovë-Serbi në Bruksel

Kryenegociatorët e Kosovës dhe Serbisë zhvilluan takime të ndara në Bruksel me të dërguarin e Bashkimit Evropian, Miroslav Lajçak.

Lajçak së pari u takua me kryenegociatorin e Kosovës, Besnik Bislimi e më pas edhe me atë të Serbisë Petar Petkoviç, por nuk pati takim trepalësh dhe të dy akuzuan njëri-tjetrin për dështimin e tij.

"Në agjendë kishte vetëm një pikë, ecja përpara me zbatimin e marrëveshjes për normalizimin e marrëdhënieve. Por, u theksua se tema shtesë mund të diskutohen nëse të dyja palët pajtohen. Ne u pajtuam për këtë, por Serbia donte ta kushtëzonte pjesëmarrjen e saj në takim me tema shtesë në agjendë, të cilat nuk ishin të pranueshme për palën kosovare", tha Bislimi.

Nga ana tjetër edhe kryenegociatori serb, Petkoviç, e akuzoi Bislimin se nuk pranoi të takohet me përfaqësuesit e Beogradit për shkak të insistimit të tij në tema si Asociacioni i komunave me shumicë serbe.

"Çfarë normalizimi është ky, nëse ju nuk dëshironi të flisni për çështjen kyç siç është Asociacioni i komunave me shumicë serbe. Një çështje kyç është gjithashtu edhe se si po jetojnë serbët në Kosovë", tha Petkoviç.

Pas përfundimit të takimit, Miroslav Lajçak ka reaguar në rrjetin X ku është shprehur i keqardhur për dështimin e takimit, por shtoi se bisedimet do të vazhdojnë në javët e ardhshme.

“Prita sot në Bruksel dy kryenegociatorët e Kosovës dhe Serbisë dhe delegacionet e tyre për takime të ndara. Më vjen keq që nuk i trajtuam çështjet më urgjente në një format trepalësh sot. Unë mbetem në dispozicion të palëve dhe do të vazhdojmë në javët në vijim”./CNA





Lajmet e fundit nga