E fundit!

23:00 Aktualitet

Zgjedhja e ekipit drejtues të PD-së/ Vijon numërimi i votave në selinë blu

Vijon procesi i numërimit të votave për zgjedhjen e strukt...

Rënia e yield-eve tkurri investimet e individëve në bono dhe obligacione

31 Gusht 2024, 09:42, Kosova & Bota CNA

Rënia e yield-eve tkurri investimet e individëve në bono dhe

Foto ilustruese

Investimet e individëve në ankandet e bonove dhe obligacioneve kanë vijuar rënien në gjysmën e parë të këtij viti.

Të dhënat e Autoritetit të Mbikëqyrjes Financiare (AMF) tregojnë se në 6-mujorin 2024, individët investuan 18.3 miliardë lekë në tregun primar të bonove dhe obligacioneve, me rënie prej 17.9% krahasuar me gjysmën e parë të vitit të kaluar.

Rënie u shënua edhe në numrin e transaksioneve, që zbriti në 6347, me rënie vjetore prej 22.8%. Sipas llojit të instrumenteve financiare, rënia është shtrirë njëkohësisht si në bono, ashtu edhe në obligacione.

Shifrat e AMF-së tregojnë se vlera e blerjeve të bonove në tregun primar zbriti në 14.68 miliardë lekë, me rënie vjetore prej 12.3%. Ndërkohë, investimi në obligacione arriti në 3.62 miliardë lekë, 34.8% më pak krahasuar me 6-mujorin e parë 2023.

Të dhënat e mësipërme u referohen transaksioneve të kryera nëpërmjet ndërmjetësve financiarë të licencuar nga AMF, kryesisht bankave tregtare.

Megjithatë, investimi në bono thesari mund të kryhet edhe nëpërmjet sporteleve të posaçme të Bankës së Shqipërisë.

Rënia e investimit të individëve në bono dhe obligacione vlerësohet të ketë ardhur kryesisht si rezultat i rënies së mëtejshme të yield-eve.

Gjatë gjysmës së parë të këtij viti, yield-et e bonove të thesarit kanë qenë në nivele shumë pranë normës bazë të interesit, madje instrumentet 3-mujore dhe 6-mujore kanë zbritur edhe poshtë normës bazë.

Një situatë e tillë e ka ulur interesin e individëve për të investuar në tregun primar.

Megjithatë, ajo që vërehet këtë vit është rritja e investimeve nga individët në tregun dytësor. Sipas statistikave të AMF-së, individët blenë afërsisht 3.1 miliardë lekë tituj nga portofolat e bankave.

Zhvendosja e interesit të individëve nga tregu primar në atë sekondar duket se shpjegohet me kthimet më të mira që ofrojnë instrumentet e emetuara nga qeveria në vitet e mëparshme, veçanërisht gjatë vitit 2022.

Rënia e yield-eve i ka bërë këto instrumente më tërheqëse dhe ka shtuar investimet e individëve në to.

Kjo tregon një njohje më të mirë të mekanizmave dhe alternativave që ofron tregu financiar, megjithëse numri i investitorëve që ka kryer investime në tregun dytësor është relativisht i vogël, me 909 transaksione gjithsej.

Në përgjithësi, yield-et e instrumenteve të borxhit të qeverisë kanë qëndruar të ulëta gjatë vitit 2023 dhe gjysmës së parë të këtij viti.

Një rritje e lehtë dhe e përkohshme u vërejt në yield-et e obligacioneve vetëm në muajt e fundit të vitit 2023, por duke qëndruar larg niveleve të arritura në vitin 2022.

Në gjysmën e parë të këtij viti, yield-et kanë lëvizur përsëri në rënie./Monitor