E fundit!

07:10 Politikë

Riformatohet kupola e PD-së, ja fituesit e posteve kyçe

Partia Demokratike ka përfunduar votimin për zgjedhjen e n...

Mbyllja e institucioneve paralele serbe në veri të Kosovës/ Reagon ashpër ambasada e SHBA

30 Gusht 2024, 22:09, Kosova & Bota CNA

Mbyllja e institucioneve paralele serbe në veri të Kosovës/

Ambasada e SHBA-së në Kosovë ka reaguar ndaj operacionit të sotëm të Policisë së Kosovës në veri të vendit, ku autoritetet kosovare mbyllën pesë institucione paralele serbe në veri të vendit.

Në komunikatën e Ambasadës së SHBA-së në Kosovë, përsëritet shqetësimi dhe zhgënjimi për veprimet e qeverisë së Kosovës duke i quajtur ato të njëanëshme.

“Me urdhër të autoriteteve politike të Qeverisë së Kosovës, Policia e Kosovës ka zhvilluar sot, më 30 gusht, operacione kundër institucioneve të mbështetura nga Serbia në veri të Mitrovicës, Zveçan, Zubin Potok dhe Leposaviq. Çështjet që kanë të bëjnë me strukturat e mbështetura nga Serbia në Kosovë duhet të trajtohen përmes dialogut të lehtësuar nga BE-ja. Ky veprim nuk ishte i koordinuar me asnjë element të bashkësisë ndërkombëtare.

Shtetet e Bashkuara dhe partnerët tanë ndërkombëtarë kanë kërkuar vazhdimisht nga Qeveria e Kosovës që të ketë prioritet koordinimin me bashkësinë ndërkombëtare dhe të mos ndërmarrë veprime të njëanshme për çështjet në agjendën e dialogut të lehtësuar nga BE-ja”, thuhet në deklaratë.

Sipas ambasadës dështimi i qeverisë së Kosovës për t’iu përgjigjur kërkesave reflekton një përkeqësim real dhe në rritje të partneritetit. Theksohet se, veprimet e pakoordinuara të Qeverisë së Kosovës i vënë në rrezik më të madh qytetarët e Kosovës dhe ushtarët e KFOR-it, përshkallëzojnë në mënyrë të panevojshme tensionet rajonale dhe minojnë reputacionin e Kosovës si një partner i besueshëm ndërkombëtar.

“Dështimi i Qeverisë së Kosovës për t’iu përgjigjur këtyre kërkesave reflekton një përkeqësim real dhe në rritje të partneritetit tonë. Siç e kemi theksuar më parë, veprimet e pakoordinuara të Qeverisë së Kosovës i vënë në rrezik më të madh qytetarët e Kosovës dhe ushtarët e KFOR-it, përshkallëzojnë në mënyrë të panevojshme tensionet rajonale dhe minojnë reputacionin e Kosovës si një partner i besueshëm ndërkombëtar.

Përderisa Qeveria e Shteteve të Bashkuara është krenare që ka mbështetur themelimin dhe profesionalizimin e Policisë së Kosovës gjatë shumë viteve si pjesë e angazhimit tonë për të promovuar sigurinë dhe stabilitetin, instrumentalizimi i vazhdueshëm i Qeverisë i Policisë së Kosovës për të kryer veprime të pakoordinuara nuk është në përputhje me premtimin të “vazhdojë konsultimin dhe koordinimin me komunitetin ndërkombëtar. Veprimet e Qeverisë do të ndikojnë edhe në cilësinë dhe natyrën e bashkëpunimit tonë me Ministrinë e Punëve të Brendshme dhe elementët vartës të saj”, thuhet në deklaratë./ CNA