E fundit!

23:00 Aktualitet

Zgjedhja e ekipit drejtues të PD-së/ Vijon numërimi i votave në selinë blu

Vijon procesi i numërimit të votave për zgjedhjen e strukt...

Raporti i Pentagonit: Hegseth rrezikoi sigurinë e trupave amerikane me informacionin e ndarë në Signal

4 Dhjetor 2025, 09:32, Kosova & Bota CNA

Raporti i Pentagonit: Hegseth rrezikoi sigurinë e trupave amerikane me

Sekretari i Mbrojtjes i SHBA-së, Pete Hegseth, mund të ketë rrezikuar sigurinë e trupave të ushtrisë amerikane kur përdori aplikacionin Signal, për të diskutuar një sulm të planifikuar ndaj militantëve në Jemen.

Kështu thuhet në një raport të inspektorit të përgjithshëm të Pentagonit, që pritet të publikohet në ditët në vijim. Inspektori i përgjithshëm (IG) zbuloi se Hegseth kishte vepruar kundër politikës së Pentagonit kur përdori aplikacionin Signal, si dhe telefonin e tij personal për të transmetuar informacione të ndjeshme në lidhje me një sulm ajror ndaj luftëtarëve Houthi përpara se ai të ndodhte.

Biseda e Signal u zbulua nga revista "Atlantic", pasi kryeredaktori i saj u shtua aksidentalisht në grup nga Këshilltari i atëhershëm i Sigurisë Kombëtare, Mike Waltz. Informacioni ishte nxjerrë nga një e-mail i klasifikuar, i cili ishte etiketuar "SECRET//NOFORN”, që do të thotë se përmbajtja e tij ishte sekrete, mund të dëmtonte sigurinë kombëtare nëse publikohej dhe se nuk duhej të shihej nga asnjë shtetas i huaj.

Administrata Trump ka mohuar se informacioni i ndarë në bisedë ishte i klasifikuar. Në një reagim lidhur me raportin, Hegseth u shpreh në “X”: "Nuk ka informacion të klasifikuar. Shfajësim total. Çështja u mbyll. Huthitë u bombarduan deri në nënshtrim."

Hetimi u kërkua nga Komiteti i Senatit për Shërbimet e Armatosura, i udhëhequr nga republikanët. Hegseth nuk pranoi të jepte një intervistë në zyrën e inspektorit të përgjithshëm dhe në vend të kësaj paraqiti një deklaratë me shkrim.

Hegseth, i cili kryeson një ushtri me më shumë se 1 milion anëtarë, është vënë nën vëzhgim kohët e fundit për mbikëqyrjen e një sulmi amerikan ndaj një anijeje që transportonte të dyshuar për trafikantë droge. Ai mohon raportet se u ka dhënë udhëzime trupave për të “vrarë të gjithë” të dyshuarit në anije dhe thotë se nuk ishte në dijeni se kishte të mbijetuar të vrarë në një sulm të dytë ajror ndaj objektivit. /CNA