web counter
LEXO PA REKLAMA!

SHKARKO APP

App Store
Google Play

E fundit!

x

Pesëmbëdhjetë muaj heqje lirie për sulm ndaj trupave të NATO-s në Kosovë

24 Qershor 2024, 19:59, Kosova & Bota CNA
Pesëmbëdhjetë muaj heqje lirie për sulm ndaj trupave të
Foto ilustruese

Një gjykatë në Prishtinë dënoi të hënën me 15 muaj heqje lirie një pjesëtar të komunitetit serb për përfshirje në sulmin e 29 majit të vitit 2023 ndaj pjesëtarëve të forcave paqeruajtëse të udhëhequra nga NATO-ja, që la pas vetes mbi 90 të plagosur nga radhët e ushtarëve të KFOR-it.

Gjykata tha se i akuzuari, të cilin mediat lokale e identifikuan si Nenad Orloviç, u dënua për veprën penale “sulm ndaj personit zyrtar”.

Ai po ashtu u dënua me 6 muaj të tjerë për veprën “pjesëmarrja në turmë që kryen vepër penale dhe huliganizëm”, thuhet në vendimin e gjykatës, në të cilin theksohet se ky dënim u zëvendësua me një gjobë prej 12 mijë eurosh.

I dënuari ishte arrestuar me 23 qershor të vitit 2023 dhe i mbeten edhe tre muaj për të përfunduar dënimin.

Në vendimin e gjykatës thuhet se me 29 maj të vitit 2023, “në intervalin kohor duke filluar nga ora 06:00 e deri në orët e mbrëmjes, në perimetrin në të cilin gjendet objekti i Komunës së Zveçanit, i akuzuari N.O në koordinim me shumë të pandehur të tjerë të nacionalitetit serb nga Kosova dhe Serbia, kishin marr pjesë aktive në grupin e personave në kryerjen e veprave penale serioze, në atë mënyrë që përmes përdorimit të dhunës i kishin sulmuar dhe kanosur ushtarët e misionit paqeruajtës të KFOR-it, duke përdorë mjete të forta, mjete shpërthyese të improvizuara si dhe armë të zjarrit...”.

Dhuna shpërtheu ndërsa grupe qytetarësh serbë u hodhën në protestat kundër dërgimit të kryetarëve shqiptarë në ndërtesat e komunave veriore, Zveçan, Zubin Potok, Leposaviç dhe Mitrovicë e Veriut, pas zgjedhjeve të 23 prillit të vitit 2023 që u bojkotuan nga partitë politike serbe.

Deri tani dhjetë persona janë arrestuar në lidhje me trazirat e dhunshme të 29 majit të vitit të kaluar, por një pjesë e tyre po mbrohen në gjendje të lirë.

Bashkimi Evropian vendosi masa ndëshkuese ndaj qeverisë së Kosovës për shkak të tensioneve në veri, ndërsa i kërkoi plotësimin e disa kushteve për heqjen e tyre.

Qeveria u pajtua të organizojë zgjedhje të reja, përmes një votimi për shkarkimin e kryetarëve aktual, i cili dështoi në muajin prill, për shkak të bojkotimit të votimeve nga pjesëtarët e komunitetit serb.

Javën e kaluar shefi i politikës së Jashtme të Bashkimit Evropian Josep Borrell, u dorëzoi vendeve anëtare të BE-së një raport lidhur me përmbushjen e kushteve për heqjen e masave dhe burimet në Bruksel thanë se raporti propozon heqjen e tyre. Ende nuk ka një vendim për këtë çështje./ Voa





Lajmet e fundit nga