Pentagoni do të dërgojë 1.500 trupa aktive në kufirin me Meksikën

22 Janar 2025, 20:24, Kosova & Bota CNA

Pentagoni do të dërgojë 1.500 trupa aktive në kufirin me

Tela me gjemba në kufirin mes SHBA-së dhe Meksikës

Pentagoni në ditët në vijim do të nisë dislokimin e deri në 1.500 trupave aktive për të ndihmuar në sigurinë e kufirit jugor, thanë zyrtarët amerikanë. Ky vendim është në kuadër të zbatimit të planeve që presidenti Donald Trump i ka shpalosur në urdhrat ekzekutivë të nënshkruar pasi mori detyrën, që synojnë të luftojnë imigrimin e paligjshëm.

Sekretari në detyrë i Mbrojtjes, Robert Salesses, pritet që gjatë të mërkurës të nënshkruajë urdhra për dislokimin e ushtarëve, por ende është e paqartë se kur ushtarët do të dislokoheshin dhe nëse numri i përgjithshëm i tyre mund të ndryshojë.

Zyrtarët që njoftuan për këtë çështje folën në kushte anonimiteti, për shkak se njoftimi për dislokimin e ushtarëve ende nuk është bërë publik, raporton AP.

Forcat aktive do t’iu bashkoheshin afër 2.500 pjesëtarëve të Gardës Kombëtare amerikane dhe Forcave Rezervë që aktualisht gjenden në kufirin mes SHBA-së dhe Meksikës. Në kufi aktualisht nuk ka trupa aktive.

Forcat pritet të përdoren për të mbështetur agjentët e patrullimit kufitar, me logjistikë, transport dhe ndërtimin e barrierave. Ata kanë bërë detyra të ngjashme në të kaluarën, kur Trump dhe ish-presidenti Joe Biden, kishin dërguar trupa aktive në kufi.

Sipas ligjit në SHBA, trupave u ndalohet që të kryejnë detyrat e organeve ligjzbatuese në kufi, por kjo mund të ndryshojë. Përmes urdhrave ekzekutivë, Trump ka udhëzuar sekretarët e ardhshëm të Mbrojtjes dhe të Brendshëm që të raportojnë brenda 90 ditësh nëse ata mendojnë se ligji i vitit 1807 duhet të shfuqizohet. Nëse ndodh kështu, atëherë trupat mund të përdoren për detyra civile të organeve të zbatimit të ligjit në tokën amerikane.

Trump sapo mori detyrën ka treguar se planifikon të përdorë ushtrinë përgjatë kufirit. Në një ndër urdhrat e parë të hënën, Trump udhëzoi sekretarin e Mbrojtjes që të paraqesë një plan për kufirin dhe si të luftohet “imigrimi masiv i paligjshëm”.

Gjatë fjalimit në ceremoninë e inaugurimit si president, Trump deklaroi se “do të shpall gjendje të emergjencës kombëtare në kufirin tonë jugor. Hyrjet e paligjshme do të ndalen menjëherë dhe do të nisë procesi i kthimit të miliona e miliona kriminelëve pa dokumente në vendet prej nga erdhën”.

Në mandatin e tij të parë si president, Trump kishte urdhëruar ushtarët aktivë që të dërgoheshin në kufi për të ndihmuar në sigurinë, pasi një karvan migrantësh nga Meksika ishte nisur drejt SHBA-së më 2018.

Në urdhrat e nënshkruar të hënën, Trump sugjeroi se ushtria do të ndihmojë Departamentin për Punë të Brendshme me “hapësira të ndalimit, transport [përfshirë avionët] dhe me shërbime të tjera logjistike”.

Ushtarëve aktivë amerikanë, sipas ligjit, iu ndalohet që të arrestojnë apo ndalojnë njerëz në kufi, nëse presidenti nuk e shfuqizon një ligj të miratuar në shekullin e 19-të. Ky ligj i mundëson presidentit amerikan që të dërgojë ushtarë aktivë dhe njësi ushtarake për t’iu përgjigjur trazirave në ndonjë shtet amerikan.

Më 2018, më shumë se 7.000 trupa aktive ishin dërguar në Teksas, Aziona dhe Kaliforni, përfshirë edhe polici ushtarake, një batalion sulmues të helikopterëve, njësi të komunikimit dhe njësi shëndetësore, inxhinierë luftarakë e njësi të tjera. Atëbotë, Pentagoni kishte deklaruar se trupat nuk do të kryenin detyra të organeve të zbatimit të ligjit, andaj dërgimi i tyre nuk përbënte shkelje të ligjeve./REL