E fundit!

18:59 Editorial

Mulizimi apo Molëzimi i PD-së?!

Në mbledhjen e fundit të Këshillit Kombëtar të PD-së p...

Nga BE në Azi, premtohet hakmarrje

3 Prill 2025, 08:02, Kosova & Bota CNA

Von der Leyen: Tarifat e Trump, goditje për ekonominë botërore

Pasi presidenti amerikan Donald Trump njoftoi tarifat e reja, ku për BE-në përcaktoi masën 20%, Brukseli reagoi ashpër. Presidentja e Komisionit Europian, Ursula von der Leyen, tha se kjo ishte një goditje e madhe për ekonominë botërore dhe pasojat "do të jenë të tmerrshme për miliona njerëz".

Ushqimet, transporti dhe ilaçet do të kushtojnë më shumë, tha ajo, "dhe kjo po dëmton, në veçanti, qytetarët më të rrezikuar".

Von der Leyen pranoi se sistemi botëror i tregtisë ka "mangësi serioze" dhe tha se BE-ja ishte e gatshme të negocionte me SHBA-në, por gjithashtu ishte e gatshme të përgjigjej me kundërmasa.

Trump prezantoi taksat e importit, të cilat ai i quan "tarifa reciproke" dhe variojnë nga 10% në 49%, në termat më të thjeshtë: SHBA, sipas Trump, do t'u bënte partnerëve të saj tregtarë atë që ai tha se u kishte bërë SHBA për dekada.

Kryeministrja konservatore e Italisë, Giorgia Meloni, i përshkroi tarifat e reja 20% kundër Bashkimit Europian si "të gabuara", duke thënë se nga ato nuk përfitonte asnjëra nga palët.

"Ne do të bëjmë gjithçka që mundemi për të punuar drejt një marrëveshjeje me Shtetet e Bashkuara, me synimin për të shmangur një luftë tregtare që në mënyrë të pashmangshme do të dobësonte Perëndimin në favor të lojtarëve të tjerë globalë," tha Meloni në një postim në "Facebook".

Qeveria e Brazilit tha se po shqyrtonte dërgimin e çështjes në Organizatën Botërore të Tregtisë. Dhe më vonë, në një shfaqje të rrallë uniteti, Kongresi i Brazilit miratoi njëzëri një projektligj reciprociteti për të lejuar qeverinë e tij të hakmerret kundër çdo vendi apo blloku tregtar që vendos tarifa për mallrat braziliane.

Vendet aziatike që janë ndër eksportuesit më të mëdhenj në SHBA u zotuan të ndërmarrin veprime të shpejta për të mbështetur prodhuesit e automjeteve dhe bizneset e tjera që mund të preken.

Udhëheqësi në detyrë i Koresë së Jugut u tha zyrtarëve të punonin me grupet e biznesit për të analizuar ndikimin e mundshëm të tarifës së re 25% për të "minimizuar dëmin", tha ministria e tregtisë.

Ministria e Tregtisë e Kinës tha se Pekini "do të marrë me vendosmëri kundërmasa për të mbrojtur të drejtat dhe interesat e veta", pa thënë saktësisht se çfarë mund të bëjë. Kina ka reaguar ndaj raundeve të mëparshme të tarifave më të larta duke vendosur tarifa më të larta mbi eksportet amerikane të produkteve bujqësore, duke kufizuar eksportet e mineraleve me rëndësi strategjike të përdorura për industritë e teknologjisë së lartë si automjetet elektrike.

Kryeministri australian, Anthony Albanese, tha se tarifat amerikane të vendosura ndaj vendit të tij ishin krejtësisht të pajustifikuara, por Australia nuk do të hakmerret.

“Presidenti Trump iu referua tarifave reciproke. Një tarifë reciproke do të ishte zero, jo 10%,” tha Albanese. SHBA dhe Australia kanë një marrëveshje të tregtisë së lirë dhe SHBA ka një suficit tregtar prej 2 deri në 1 dollarë me Australinë. "Ky nuk është akt i një miku."

Tarifa prej 29% e vendosur në postin e vogël të ishullit Norfolk në Paqësorin Jugor erdhi si një tronditje. Territori australian ka një popullsi prej rreth 2,000 njerëz dhe ekonomia sillet rreth turizmit.

Zelanda e Re gjithashtu kundërshtoi logjikën tarifore të Trump. Të kursyer për momentin nga raundi i fundit i tarifave ishin Meksika dhe Kanadaja, për mallrat tashmë të kualifikuara sipas marrëveshjes së tyre të tregtisë së lirë me Shtetet e Bashkuara. Megjithatë, tarifat e shpallura më parë prej 25% për importet e automjeteve ishin planifikuar të hynin në fuqi në mesnatë.

Presidentja e Meksikës, Claudia Sheinbaum, do të shqyrtojë kundërmasa.

“Nuk është çështja nëse më vendosni tarifa, unë do t'ju vendos tarifa. Interesi ynë është në forcimin e ekonomisë meksikane", tha ajo teksa pritej prezantimi i tarifave të reja nga Trump.

Presidenti i Kolumbisë, Gustavo Petro, i cili është përplasur me Trump më parë, tha përmes X se tarifat shënuan një moment historik global: "Sot neoliberalizmi që shpalli politikat e tregtisë së lirë në të gjithë botën ka vdekur". Analistët thonë se ka pak për të përfituar nga një luftë tregtare gjithëpërfshirëse, as në Shtetet e Bashkuara e as në vende të tjera./ CNA