web counter
LEXO PA REKLAMA!

SHKARKO APP

App Store
Google Play

Rriten rastet me meningjit në Kosovë/ Ministria e Shëndetësisë bën thirrje për vigjilencë

16 Gusht 2023, 11:27, Kosova & Bota CNA
Rriten rastet me meningjit në Kosovë/ Ministria e
Foto ilustruese

Ministria e Shëndetësisë e Kosovës (MSH) u ka bërë thirrje qytetarëve të kenë kujdes të shtuar dhe kontroll të vazhdueshëm të ujit të pijshëm, për shkak të një rritje të rasteve me meningjit gjatë dy muajve të fundit.

Në një komunikatë për media ditën e sotme, ministria njoftoi se kërkohet kontroll i shtuar i ujit të pijshëm dhe pishinave për të parandaluar infeksionet e ndryshme.

Bazuar në raportin e Shërbimit Siptalor të Klinikës Universitare të Kosovës, numri i rasteve të raportuara për Sindromën meningjeale gjatë muajit korrik-gusht, krahasuar me të njëjtën periudhë të vitit të kaluar ka shënuar rritje.

“Meningjiti mund të prekë këdo që bie në kontakt me agjentin, por disa grupmosha janë më të rrezikuara. Sipas Organizatës Botërore të Shëndetësisë, meningjiti prek më së shumti moshat e reja ngaqë sistemi imunitar te personat e rinj, kryesisht foshnjat, fëmijët dhe adoleshentët nuk është zhvilluar mjaftueshëm për të luftuar agjentët”, tha MSH.

Shkaktar i sindromës

Shkaktar i sindromës meningjeale janë infeksionet bakteriale ose virale. Ndërsa, si rrugë e përhapjes së infeksionit mund të jenë pishinat, vendet e freskimit, kontakti dhe uji për pije, paralajmëroi ajo.

Simptomat

1.Disa nga simptomat e sëmundjes janë të ngjashme me ato të një gripi normal, por që rëndohen për një kohë shumë të shkurtër.

2.Meningjiti mund të shfaqet menjëherë ose 3-7 ditë pas marrjes së infeksionit.
Te simptomat e sëmundjes përfshihen: të vjella, marramendje, temperaturë e lartë e trupit, dhimbje e muskujve, ndjeshmëri ndaj dritës, dhimbje e kokës, konfuzion, gjymtyrë të ftohta, skuqje e lëkurës.

3.Te fëmijët mund të ketë edhe simptoma si frymëmarrja e shpejtuar, irritim dhe të qara për një kohë të gjatë, humbje të përqendrimit dhe mungesë oreksi.

Sapo të vëreni simptomat e mësipërme apo gjendje të rënduar shëndetësore, duhet menjëherë të konsultoheni te mjeku.

Trajtimi

Meningjiti trajtohet vetëm në spital./ CNA





Lajmet e fundit nga