Ministria e Jashtme italiane kërkon deportimin e aktivistëve të flotiljes së Gazës

4 Tetor 2025, 15:24, Kosova & Bota CNA

Ministria e Jashtme italiane kërkon deportimin e aktivistëve të

Të paktën katër parlamentarë italianë që udhëtonin si pjesë e Flotiljes Global Sumud (GSF) janë deportuar tashmë në Romë. Më shumë se 470 persona, të kombësive të ndryshme, u ndaluan, tha policia izraelite në një deklaratë. Ministria e Jashtme e Italisë i ka bërë thirrje Izraelit të përshpejtojë procesin e deportimit të aktivistëve italianë të ndaluar në Izrael.

Paraditen e sotme, Ministria e Jashtme Italiane tha se anëtarët e ambasadës së saj në Izrael kishin vizituar aktivistët të cilët janë mirë, pavarësisht lodhjes prej një muaji në det dhe dy ditëve të stresit të thellë që përkojnë me operacionin ushtarak kundër anijeve.

"Ekipi konsullor raportoi se kushtet e paraburgimit në burg janë veçanërisht të pakëndshme", tha një deklaratë nga Ministria e Jashtme. Ministri i Jashtëm Italian, Antonio Tajani ka kërkuar një inspektim dhe përmirësim të kushteve të paraburgimit.

Italia po punon për të përshpejtuar procesin e deportimit, i cili do të jetë veçanërisht i shpejtë për ata bashkatdhetarë që kanë vendosur të nënshkruajnë urdhrin e deportimit të propozuar nga autoritetet izraelite.

Ndalimi i flotiljes shkaktoi protesta në të gjithë botën, duke përfshirë një grevë të përgjithshme njëditore në Itali që vonoi qindra trena, disa fluturime vendase dhe mbylli shkollat. Ndalimet vijnë ndërsa anija e fundit e konvojit të GSF, Marienette, u ndalua nga autoritetet izraelite të premten.

Marinette kishte qenë pas pjesës tjetër të anijeve dhe ende po lundronte drejt territorit palestinez në orët e para të së premtes, një ditë pasi marina izraelite sulmoi 41 anije të tjera dhe ndaloi aktivistët, duke thënë se ata do të deportoheshin. Një transmetim i drejtpërdrejtë nga Marinette tregoi momentin kur trupat izraelite hipën në anije.

Ministria e Jashtme e Izraelit i ka quajtur veprimet e flotiljes një "provokim" dhe argumentoi se flotilja po përpiqej të hynte në një zonë aktive luftimi dhe të shkelte një bllokadë të ligjshme detare. Ajo deklaroi se të gjithë pasagjerët janë të sigurt dhe në gjendje të mirë shëndetësore. Ata po udhëtojnë të sigurt për në Izrael, nga ku do të deportohen në Evropë”. Aktivistët kanë thënë se ndalimi i anijeve ishte i paligjshëm dhe pretendojnë se janë trajtuar keq nga autoritetet izraelite.

Mariana Mortágua, aktiviste portugezë mendohet se i dërgoi një mesazh familjes së saj duke thënë se ishte mbajtur pa ushqim për 48 orë. Ndërkohë, tre shtetasve polakë që po merrnin pjesë në flotilje u është ofruar një procedurë e përshpejtuar për t'u larguar nga Izraeli dhe për t'u kthyer në Poloni. Ata thuhet se refuzuan të nënshkruanin një deklaratë që përbënte dëbim vullnetar nga Izraeli./CNA