Mali i Zi dhe procesi i integrimeve europiane

5 Maj 2024, 21:04, Kosova & Bota CNA

Analistët vlerësojnë se në Mal të Zi duhet të ketë një mirëkuptim për çështjet e interesit kombëtar dhe një përshtatje me politikën e jashtme të Bashkimit Evropian.

Ish kryeredaktori i gazetës malazeze “Zid” dhe “Liberal” dhe analisti, Xhevdet Pepiç, vë në dukje, se qeveria malazeze nuk është e përgatitur për integrimet evropiane.

“Kjo qeveri, si ata të mëparshmet, nuk është e përgatitur për integrimet evropiane, pasi me një sistem të këtillë të vlerësimit nuk siguron ndonjë ardhmëri të qartë”, tha zoti Pepiç.

Analisti Nikollë Berishaj vlerëson se mbështetja e Brukselit zyrtar më shumë është rrjedhojë e situatës në Ukrainë dhe situatës aktuale gjeopolitike në rajon.

“Këtë mbështetje më shumë ia adresoj këtë interesim të BE-së situatës në Urainë dhe situatës gjeopolitike në rajon. Vonesat që janë bërë në integrimin e shteteve të Ballkanit Perëndimor më shumë ka qenë vonesë e BE-së, sesa dëshirë e shteteve në fjalë”, tha zoti Berishaj.

Zoti Berishaj, ndërkaq shpreh rezerva të theksuara për riorganizimin e qeverisë me partitë pro-serbe dhe pro-ruse.

“Riorganizimi me katër ministra të ardhshëm që kanë propagandën e Kishës Ortodokse Serbe që nuk e pranon Malin e Zi si shtet dhe që nuk e pranon kombin dhe kishën malazeze do të jetzë një hap mbrapa apo së paku një stagnim në këto integrime dhe nuk jam entuziast për një gjë të tillë,“ tha zoti Berishaj.

Në këtë kuadër edhe Zoti Pepiç e sheh si jo efikase riorganizimin e qeverisë me forca tjera politike.

“Riorganizimi i qeverisë paraqet një ngarkesë edhe më të madhe financiare për institucionet dhe nuk garanton ndonjë sukses në politikën e brendshme dhe të jashtme të vendit”, tha zoti Pepiç.

Zoti Berishaj e konsideron si lojë politike të qeverisë qëndrimin jo të qartë të kryeministrit malazez për Rezolutën e Srebrenicës.

“Edhe kjo lojë e kryeministrit Spajiç se nuk do ta sponsorizojë , por do ta votojnë është më tepër është pasojë e trysnisë se sa vullneti i tyre”, tha zoti Berishaj.

Edhe zoti Pepiç vlerëson se me çështjen e Srebrenicës qeveria nuk është transparente dhe po manipulon opinionin publik.

“Me këtë çështje qeveria malazeze po manipulon në masë të madhe opinionin dhe ka mjaftë jotransparencë. Kryeministri Spajiq në këtë çështje duhet të jetë shumë i qartë dhe konkret”, tha analisti Xhevdet Pepiç.