Kuvendi i Kosovës nuk konstituohet as në përpjekjen e 50-të

21 Korrik 2025, 12:01, Kosova & Bota CNA

Deputetët e Kuvendit të Kosovës nuk kanë arritur as për të 50-ën herë ta konstituojnë Kuvendin e Kosovës, pavarësisht zërave se në fundjavë do të mund të arrihej një marrëveshje për zhbllokim të situatës.

Të pranishëm në seancë kanë qenë 104 deputetë.

Deputeti i Partisë Demokratike të Kosovës, Elmi Reçica, i ka bërë thirrje kryesuesit të seancës, Avni Dehari, nga Lëvizja Vetëvendosje, që të mos lejojë të "keqpërdoret”.

Edhe Lidhja Demokratike e Kosovës e ka akuzuar Deharin për “abuzim” me pozitën.

Para nisjes së seancës, avokati Arianit Koci e ka qethur kokën para Kuvendit, duke thënë se ky është akt simbolik, përmes së cilit po dëshmon se “ka ardhur fundi”.

“Kjo nuk është më politikë, prandaj unë kërkoj që menjëherë sot të formohet Kuvendi”, ka thënë avokati Koci, duke përsëritur se nga kjo zvarritje po rrezikohet “shtetësia e Kosovës”.

Kuvendi nuk është konstituuar as pas një takimi të zhvilluar të shtunën mes kryeministrit në detyrë të Kosovës, Albin Kurti, njëherësh kryetar i Lëvizjes Vetëvendosje, me kryetarin e Nismës Socialdemokrate, Fatmir Limaj. Hollësitë e takimit nuk janë bërë të ditura.

Deputetja e Nismës, Xhevahire Izmaku ka deklaruar paraprakisht se partia së cilës i takon ajo kërkon që Limaj të propozohet për kryetar Kuvendi.

Deputetë të Lidhjes Demokratike (LDK) të Kosovës dhe Aleancës për Ardhmërinë e Kosovës (AAK) kanë përsëritur të hënën se nuk kanë votë për Limajn si kryetar Kuvendi.

Për dallim prej tyre, kryetari i partisë serbe për Liri, Drejtësi dhe Mbijetesë, Nenad Rashiq, njëherësh ministër në detyrë për Komunitete dhe Kthim i Kosovës, ka thënë se nëse Lëvizja Vetëvendosje propozon Limajn për kryetar, ai do të votonte pro.

Deputetë të Partisë Demokratike të Kosovës (PDK) kanë thënë në të kaluarën se nuk e votojnë asnjë kandidat që ka mbajtur pozita ministrore në të kaluarën.

Situata është bllokuar pasi PDK, LDK, AAK dhe Lista Serbe – partia më e madhe e serbëve në Kosovë – nuk pranojnë të propozojnë nga një kandidat për formim të një komisioni për votim të fshehtë, me arsyetimin se mënyra e ndryshimit të votimit është jokushtetuese.

Lëvizja Vetëvendosje kërkon që për Albulena Haxhiun – të propozuar për kryeparlamentare – të votohet vetëm një herë përmes votimit të fshehtë dhe nëse nuk i siguron 61 votat e nevojshme, ajo do të tërhiqet nga gara.

Haxhiu nuk i ka siguruar votat e nevojshme në disa seanca radhazi që janë mbajtur me votim të hapur. Për disa parti, ajo është figurë përçarëse dhe e papranueshme./ REL