web counter
LEXO PA REKLAMA!

SHKARKO APP

App Store
Google Play

E fundit!

x

Kryeministri hungarez, kundër rishikimit të rregullave të BE-së për emigrantët dhe azilkërkuesit

9 Qershor 2023, 16:32, Kosova & Bota CNA

Kryeministri hungarez, kundër rishikimit të rregullave të

Kryeministri hungarez, Viktor Orban, e vlerësoi të papranueshme marrëveshjen brenda Bashkimit Evropian (BE) për rishikimin e rregullave në lidhje me emigrantët dhe azilkërkuesit.

“Brukseli po e keqpërdor pushtetin e tij. Ata duan të zhvendosin me forcë emigrantët në Hungari. Kjo është e papranueshme, ata duan ta kthejnë me forcë Hungarinë në një vend emigrantësh”, tha Orban, më 9 qershor.

Një ditë më parë, ministrat e Brendshëm të shteteve anëtare të BE-së ranë dakord për dy propozime kryesore ligjore për migracionin dhe azilin, të cilat duhet të jenë shtyllat kryesore të reformave në këtë fushë.

Parashikohet ndihma e detyrueshme midis vendeve të BE-së, me mundësinë e realizimit në njërën nga dy mënyrat. Prioriteti është që vendet e BE-së të ndajnë akomodimin për azilkërkuesit, duke pranuar shumë prej atyre që arrijnë në vendet, të cilat janë në skajet e jashtme të bllokut, kryesisht në Greqi dhe Itali.

Ministrja suedeze e emigracionit, Maria Malmer Stenergaard, tha gjithashtu se u miratua propozimi i shtetit të saj, që nënkupton se vendet që nuk duan të pranojnë emigrantë, mund të paguajnë 20,000 euro për një emigrant.

Sistemi evropian i azilit u shemb tetë vjet më parë, pasi më shumë se një milion njerëz hynë në Evropë, duke ikur nga konflikti në Siri. Objektet për pranim në Greqi dhe Itali ishin të stërmbushura, gjë që rezultoi në një krizë politike në BE.

Që atëherë, 27 shtetet anëtare evropiane kanë debatuar se cilat vende duhet të marrin përgjegjësinë për njerëzit që vijnë pa leje, si dhe nëse anëtarët e tjerë duhet të jenë të detyruar t’i ndihmojnë ato.

Për të mbështetur propozimet e reja ligjore për emigracionin dhe azilin, kërkohej një shumicë e kualifikuar - dy të tretat e shteteve anëtare, ku jetojnë dy të tretat e rreth 450 milionë njerëzve në BE.

Ndër vendet që votuan kundër ishte Hungaria. Zëvendësministri hungarez i Brendshëm, Bence Retvari, tha se BE-ja “po i eliminon opinionet e vendeve anëtare se kush jeton në territoret e tyre”.

Pas votimit të qëndrimit të përbashkët të shteteve anëtare për dy propozime legjislative, të cilat do të trajtojnë çështjet e migracionit dhe azilit, do të pasojnë negociatat me Parlamentin Evropian.

Pritet që paketa e propozimeve ligjore për migracionin dhe azilin të miratohet deri në zgjedhjet për Parlamentin e ri Evropian, në qershor të vitit 2024./ REL





Lajmet e fundit nga