Kriza në Maqedoninë e Veriut/ Flet gazetari: Ja çfarë fitojnë shqiptarët nëse ndryshon kushtetuta

15 Korrik 2022, 21:00, Kosova & Bota CNA

Kriza në Maqedoninë e Veriut/ Flet gazetari: Ja çfarë

Gazetari, Naser Pajaziti

Teksa komenton krizën politike që po kalon Maqedonia e Veriut, për shkak të propozimit francez, gazetari Naser Pajaziti, ka zbuluar në emisionin “Ballkan” përfitimet që mund të kenë shqiptarët e Maqedonisë së Veriut në rast se ndryshon kushtetuta e vendit.

Aktualisht në kushtetutën e MV gjuha shqipe nuk njihet si gjuhë shqipe, por si gjuhë që flet mbi 20% e popullsisë maqedonase, pra nuk emërtohet si gjuhë shqipe.

Për këtë arsye gazetari thotë se në kuadër të krizës politike dhe të probabilitetit të ndryshimit të kushtetutës në vend, shqiptarët e MV mund ta shfrytëzojnë për t’i dhënë emër gjuhës shqipe në Maqedoninë e Veriut.

Por që të bëhet një gjë e tillë, nuk mjafton shumica e thjeshtë e parlamentit (mazhoranca dhe partitë shqiptare), për ndryshimin e kushtetutës duhet shumica absolute që do të thotë duhet edhe miratimi i opozitës, e cila ditët e fundit ka ngritur protesta në vend, për shkak të propozimit francez.

“Pritet të ketë maratonë gjatë ditëve në vijim. Për ta miratuar propozimin francez në parlamentin maqedonas duhet shumicë e thjeshtë që koalicioni aktual i ka.
Ndërsa për ndryshimet kushtetuese përfshirë këtu pakicën bullgare, atëherë fillon problemi, sepse shumica aktuale dhe partitë shqiptare nuk i kanë dy të tretat për të bërë ndryshimet kushtetuese.

Gjuha shqipe në kushtetutë nuk njihet si gjuhë shqipe por si gjuhe e komunitetit që flasin mbi 20% e popullsisë. Hapja e kushtetutës ka një komponente të veçantë për shqiptarët e MV për ta futur me emër dhe me mbiemër gjuhën shqipe në kushtetutën maqedonase.
Reagimi i maqedonase ndërlidhe dhe me këtë, ata i frikësohen ndryshimet kushtetuese me paranojën se po humbasin shtetin e tyre dhe paranoja të tjera që i kanë krijuat dhe ndaj propozimit francez që sipas tyre çon në bullgarzimin e Maqedonisë”, tha gazetari në Ballkan.

Ndër të tjera gazetari theksoi se për miratimin e propozimit francez nevojitet vetëm shumica e thjeshtë, pra mazhoranca dhe partitë shqiptare, ndërsa për ndryshim kushtetute duhet shumica absolute.

Gjithashtu ai tha se pritet një maratonë e gjatë në parlament deri në miratimin e propozimit francez.

“Kemi situatë të tensionuar, por ka optimizëm që propozimi francez do të marrë dritë jeshile. Nuk kemi fluks të madh protestuesish, kemi tek-tuk grupe të ekstremit të djathtë.
VMRO ka si synim vetëm zgjedhjet e parakohshme. Në plan të përgjithshëm ka dakordësi, janë detaje të propozimit që nuk pranohen nga opozita maqedonase.
A do të miratohet propozimi francez sot? Pritet të ketë maratonë gjatë ditëve në vijim. Pritet një tension te opozita maqedonase, sepse nëse kërkohet shumica absolute për ndryshime kushtetuese mazhoranca aktuale bashkë me partinë shqiptare nuk i ka numrat e duhur. Pritet ditën të vijim një zhvillim optimist për miratimin e këtij propozimi nga qeveria në parlament”, tha gazetari./CNA.al