E fundit!

12:23 Aktualitet

Ja kush e merr drejtimin e Policisë së Vlorës

Edvin Ndreu, i renditur me 84 pikë në garën për drejtoritë...

Kandidati i Dodik-ut fiton ngushtë zgjedhjet presidenciale

24 Nëntor 2025, 10:50, Kosova & Bota CNA

Sinisa Karan kandidat i liderit të larguar serb, Milorad Dodik, fitoi zgjedhjet presidenciale në Republikën Srpska. Rezultati është i ngushtë e i diskutueshëm. Ekspertët dyshojnë se Dodik do të mbajë pushtetin.

Komisioni Qendror i Zgjedhjeve njoftoi të dielën vonë (23.11.) në mbrëmje se afërsisht 51 për qind e votuesve hodhën votën e tyre për Siniša Karan në zgjedhjet presidenciale në Republika Srpska. Ai është kandidati i partisë nacionaliste serbe në pushtet SNSD, së cilës i përket edhe udhëheqësi i larguar Milorad Dodik. Rreth 48 për qind votuan për sfiduesin e Karan, Branko Blanuša, të partisë opozitare SDS. SDS është gjithashtu parti nacionaliste serbe, por kritikon korrupsionin e qeverisë aktuale.

Karan sheh konfirmim të kursit të tij konfrontues

Karan e shpalli veten fitues të zgjedhjeve. Ai falënderoi votuesit dhe e vlerësoi rezultatin si shenjë mbështetjeje për kursin konfrontues të paraardhësit të tij Dodik kundër shtetit të bashkuar të Bosnjës dhe Hercegovinës dhe kundër Perëndimit. "Populli serb dhe Republika Srpska mund të durojnë çdo gjë. Por ata kurrë nuk mund të durojnë poshtërimet e shkaktuara nga të huajt që besojnë se mund të shkatërrojnë vullnetin e popullit serb", tha Karan në fjalimin e tij të fitores. Populli serb tani ka dhënë një përgjigje të vendosur: "Ata i thonë jo çdo uzurpatori që merr pushtetin. Ata vendosin vetë për fatin e tyre."

Shumica e ekspertëve mendojnë se Karan nuk do të ketë shumë të drejtë fjale si president, dhe se kreu i partisë së tij, Milorad Dodik, do të mbetet njeriu më i fuqishëm në vend. Dodik e qeverisi Republikën Serbe në mënyrë autokratike për gati 30 vjet në role të ndryshme. Ai, familja e tij dhe miqtë e tij kontrollojnë kryesisht ekonominë, Gjyqësorin dhe median në Republikën Serbe, shkruan media gjermane "tagesschau".

Milorad Dodik dha dorëheqjen pas dënimit nga Gjykata e Drejtësisë e Bosnjës dhe Hercegovinës me një ndalim gjashtëvjeçar të mbajtjes së posteve publike. Dodiku ka ndjekur një politikë separatiste, nënshkroi ligje ilegale në Republikën Srpska dhe shpërfilli rregullisht institucionet kombëtare të Bosnjës dhe Hercegovinës./ DW