E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Izraeli sulmon Gazën qendrore teksa synon zgjerimin e ofensivës

26 Dhjetor 2023, 14:19, Kosova & Bota CNA

Forcat izraelite kanë bombarduar kampet palestineze të refugjatëve në Gazën qendrore të martën, thanë banorët. Duket se Izraeli po përgatitet të zgjerojë ofensivën e tij tokësore në seksionin e tretë të territorit të pushtuar.

Izraeli është zotuar se do të shtypë Hamasin – grup palestinez të shpallur organizatë terroriste nga SHBA-ja – për shkak të sulmit vdekjeprurës që grupi kreu në jug të Izraelit më 7 tetor. Për javë të tëra, forcat izraelite janë përfshirë në luftime të ashpra urbane në veri të Gazës dhe në qytetin jugor të Han Junisit, duke shtyrë palestinezët që të gjejnë strehim në skajet e territorit.

Pavarësisht presionit ndërkombëtar për armëpushim dhe thirrjeve të Shteteve të Bashkuara për të reduktuar numrin e viktimave në mesin e civilëve, kryeministri izraelit, Benjamin Netanyahu, një ditë më herët paralajmëroi se lufta nuk është afër fundit.

Lufta ka shkatërruar pjesë të mëdha të Gazës, duke vrarë më shumë se 20.600 palestinezë dhe duke detyruar që të zhvendoset pothuajse e gjithë popullsia e territorit prej 2.3 milionë banorësh.

Si pasojë e sulmeve të Hamasit, në Izrael janë vrarë 1.200 persona dhe janë zënë rob 240 të tjerë.

Banorët e Gazës qendore thanë më 26 dhjetor se gjatë natës ka pasur granatime dhe sulme ajrore në kapet Nuseriat, Magazi dhe Burej. Në këto kampe janë strehuar palestinezët e larguar nga shtëpitë e tyre gjatë luftës së vitit 1948 me Izraelin – dhe tani kampet janë mbushur edhe me të zhvendosurit si pasojë e luftës së fundit.

“Bombardimet ishin shumë intensive”, tha Radwan Abu Sheitta, mësues palestinez që jeton në Burej.

Brigada e Kasamit, që është krahu ushtarak i Hamasit, tha se luftëtarët e tij kanë goditur një tank izraelit në lindje të Burejit. Ky pretendim nuk ka mundur të konfirmohet në mënyrë të pavarur, por sugjeron se forcat izraelite po lëvizin drejt kampit.

Po ashtu, sulme nga ajri ka pasur edhe në linde të kampit Nuseriat, thanë banorët.

Izraeli është zotuar se do të vazhdojë luftën për të shkatërruar aftësitë ushtarake dhe qeverisëse të Hamasit, grupit që udhëheq me Gazën që 16 vjet./ REL