E fundit!

09:03 Sociale

Epidemia e heshtur, një në dy shqiptarë ndërron jetë nga zemra

Në mënyrë sistematike në 15 vitet e fundit, çrregullimet e...

Italia do të ndërtojë urën për në Sicili

9 Gusht 2025, 15:00, Kosova & Bota CNA

Ura për në Sicili është projekti i zemrës për ministrin e Komunikacionit Matteo Salvini. Ndërtimi i urës do të hyjë në histori, deklaroi ai (06.08.2025). Salvini bashkë me kryeministren Giorgia Meloni e kanë shpallur këtë si një projekt prestigji. Që nga fillimi i qeverisjes së tyre ata kanë miratuar hap pas hapi pjesë të ndryshme të projektit. Së fundi u dha drita e gjelbër edhe nga forumi, që miraton në Itali paratë për projekte të mëdha kombëtare. Kësisoj projekti i urës është më pranë konkretizimit se kurrë më parë. "Ura do të jetë një përshpejtuese e zhvillimit. Ajo do të zgjidhë një pjesë të problemeve në jug të Italisë", premtoi Salvini. Ura do të krijojë vende pune, do të afrojë në rajon inxhinierë të mirë dhe do të thjeshtojë transportin e rajonit. Për të gjitha këto kanë nevojë rajonet e Sicilisë dhe Kalabrisë, që do të lidhen përmes urës. Këto rajone janë të prekura nga papunësia dhe infrastruktura e dobët.

Kantier ndërtimi në një zonë sizmike

Gino Sturniolo nga Mesina në Sicili nuk beson, që prej urës gjendja do të bëhet më mirë në rajonin e tij. Paratë për që do të shpenzohen për urën, rajoni mund t'i përdorte më mirë për gjëra të tjera. "Ne ndonjëherë kemi në shtëpi vetëm për disa orë ujë, sepse linjat e ujësjellësit janë në gjendje të keqe. Paratë do të ishte më mirë të shpenzoheshin për nevoja thelbësore si furnizimi me ujë.”

Struniolo angazhohet në nismën qytetare "No Ponte" (jo urë). Kritikët gjithashtu qysh në krye të herës kanë ngritur problemin e pozitës gjeografike, pasi kjo është një zonë me aktivitet të lartë sizmik. Gjithashtu ngrihen shqetësime për cenimin e sistemit ekologjik në ngushticën e Mesinës. Po ashtu shtrohet edhe problemi i investimit të parave në projekte të tjera më të nevojshme për rajonin.

Konkurrim idesh urën e Mesinës qysh në 1969

Diskutimi për ndërtimin e urës për në Sicili ka nisur dekada më parë. Më 1969, përpara më shumë se 50 vjetësh, është hapur konkursi i ideve për një projekt të tillë. Kryesisht Silvio Berlusconi ka pas ndërmarrë disa nisma për realizimin e urës. Por asnjëherë nuk u arrit kjo, sepse qeveritë pasuese vazhdimisht e ndalonin ndërtimin e urës.

Nisma qytetare "No Ponte" ka edhe një tjetër shqetësim, drojën se rajoni do të shndërrohet në një kantier gjigant ndërtimi që mund të zgjasë me dekada. E në fund shuma të mëdha parash publike do të shpenzohen pa e prekur konkretisht rezultatin, thotë, Struniolo.

Kostot e parashikuara 13,5 miliardë euro gjithsej

Por sipas ministrit të Komunikacionit Salvini, kjo nuk do të ndodhë. Qeveria lë të kuptohet, se ka mjaft para për ndërtimin e urës. Duke e shpallur urën si relevante për mbrojtjen synohet që projekti për ndërtimin e saj të klasifikohet si projekt strategjik infrastrukture me rëndësi për NATO-n. Në këtë mënyrë shtohen mundësitë për financimin. Ndërtimi i urës është parashikuar të ketë një kosto të përgjithshme rreth 13,5 miliardë euro. Gjashtë korsi autostrade janë planifikuar mbi të si dhe dy linja hekurudhore.

Ministri Salvini është i sigurt që punimet e ndërtimit mund të fillojnë qysh këtë vjeshtë në shtator ose tetor. Kundërshtarët e urës kanë planifikuar një demonstratë të re në fundjavë në Mesina./ DW