Dy punonjës amerikanë të plagosur gjatë shpërndarjes së ndihmave në Gaza

5 Korrik 2025, 21:39, Kosova & Bota CNA

Dy punonjës amerikanë të plagosur gjatë shpërndarjes

Dy punonjës amerikanë janë plagosur në jug të Rripit të Gazës gjatë një sulmi me granata dore, teksa shpërndanin ndihma humanitare në qytetin Khan Younis. Lajmi u konfirmua nga Fondacioni Humanitar i Gazës (GHF), një organizatë e mbështetur nga Shtetet e Bashkuara dhe Izraeli, raporton BBC.

Sipas njoftimit zyrtar të fondacionit, sulmi ndodhi të shtunën dhe përgjegjësia për të i atribuohet Hamasit, megjithëse ky i fundit nuk ka komentuar ende mbi incidentin. Punonjësit e plagosur ndodhen në gjendje të qëndrueshme dhe po marrin trajtim mjekësor. Asnjë civil apo anëtar tjetër i stafit nuk është lënduar.

GHF nisi operacionet e saj në muajin maj, duke shpërndarë ndihma në disa pika në jug dhe qendër të Gazës. Megjithatë, operacioni ka qenë objekt i kritikave të ashpra nga organizata ndërkombëtare për shkak të rrezikut që u kanoset civilëve, të cilët shpeshherë detyrohen të kalojnë në zona lufte për të marrë ndihma.

Sipas të dhënave nga Kombet e Bashkuara dhe mjekë lokalë, që nga fillimi i operacioneve të GHF, mbi 400 palestinezë janë vrarë nga forcat izraelite ndërsa përpiqeshin të merrnin ndihma ushqimore. Izraeli nga ana e tij ka deklaruar se sistemi i ri i shpërndarjes synon të parandalojë që ndihmat të përfundojnë në duart e Hamasit.

Fondacioni theksoi se sulmi ndodhi “në përfundim të një shpërndarjeje të suksesshme, gjatë së cilës mijëra banorë të Gazës morën ushqim në mënyrë të sigurt”. Në deklaratë thuhet gjithashtu se GHF kishte paralajmëruar më parë për “kërcënime të besueshme” nga Hamasi kundër punonjësve amerikanë, atyre palestinezë dhe civilëve.

Ndërkohë, Agjencia e Mbrojtjes Civile në Gaza ka raportuar se 32 palestinezë janë vrarë të shtunën nga operacionet ushtarake izraelite.

Të premten, Hamasi deklaroi se ishte i gatshëm për të vijuar bisedimet për një marrëveshje armëpushimi të propozuar nga Shtetet e Bashkuara. Marrëveshja parashikon një shkëmbim gradual të pengjeve izraelitë me të burgosur palestinezë, por Hamasi ka kërkuar disa ndryshime në projektin fillestar.

Sipas burimeve diplomatike, Hamasi kërkon që Shtetet e Bashkuara të garantojnë përfundimin e luftimeve pas armëpushimit dhe që shpërndarja e ndihmave të bëhet vetëm nga Kombet e Bashkuara dhe organizatat partnere, duke shkarkuar nga ky rol Fondacionin Humanitar të Gazës. Izraeli ka refuzuar deri më tani këto kushte.

Aktualisht, 50 pengje izraelite ndodhen ende në Gaza, dhe besohet se të paktën 20 prej tyre janë gjallë.

Sipas Ministrisë së Shëndetësisë në Gaza, numri i të vrarëve ka arritur në 57,338 persona, që prej fillimit të ofensivës izraelite më 7 tetor 2023, si kundërpërgjigje ndaj sulmit të Hamasit, në të cilin u vranë rreth 1,200 persona dhe u morën peng 251 të tjerë.