Kolumbi, kapet droni i parë nënujor i "narkos"/ I drejtuar me Starlink, mund të transportojë një ton kokainë

5 Korrik 2025, 14:45, Kosova & Bota Guido Olimpio

Kolumbi, kapet droni i parë nënujor i "narkos"/ I drejtuar

Kontrollohet me telekomandë me një modem Starlink dhe mund të mbajë më shumë se një ton kokainë dhe ka një rreze veprimi deri në 800 milje.

Narko-kompanitë kolumbiane janë eksperte të mëdha në "logjistikë" dhe përpiqen çdo ditë të përmirësojnë pajisjet e tyre. Kjo zbulohet nga një aksion i kryer nga ushtria kolumbiane që çoi në identifikimin e një droni nënujor të drejtuar nga një sistem satelitor Starlink.

Anija, e zbuluar në një plazh në rajonin e Santa Martës në Karaibe, ishte e aftë të transportonte një ton kokainë dhe kishte si destinacion të mundshëm (të ardhshëm) SHBA-në. Mund të mos ketë qenë ende funksionale dhe ka të ngjarë që kriminelët ta kenë testuar atë.

Sipas hetuesve, kjo është anija e parë e këtij lloji e kapur në vend, një evolucion i të ashtuquajturave narko-nëndetëse, "anije" me profil të ulët me një ekuipazh (3-4 elementë) të përdorura që nga mesi i viteve 1990 për të kontrabanduar drogë në Amerikën Qendrore dhe Shtetet e Bashkuara.

Rrugët u zgjeruan më pas drejt Europës, në veçanti Gadishullit Iberik, ku u sekuestruan disa të tilla.

Droni u lejon trafikantëve fleksibilitet më të madh. Është më pak i dukshëm, nuk kërkon rekrutimin e "marinarëve" dhe gjithçka që kjo përfshin në aspektin e organizimit, edhe nëse ka një kapacitet më të ulët ngarkese sesa modelet tradicionale (ato mbajnë 3-4 tonë drogë). Disa hetime në të kaluarën kanë treguar se si kartelet, përfshirë ato europiane, kanë zhvilluar dronë të vegjël, por ai kolumbian është i veçantë për lidhjen e tij satelitore që garanton një gamë të gjerë veprimi.

Në këtë drejtim, zyrtarët e Marinës kanë hipotezuar përfshirjen e teknikëve të huaj të punësuar për të instaluar pajisjet, për të ofruar ndihmë dhe për të zgjidhur çdo problem. Përdorimi i specialistëve të komunikimit është një konstante nga ana e organizatave kriminale. Në Meksikë, ata ndihmuan në ngritjen e një rrjeti paralel radiofonik të përdorur nga bandat për të menaxhuar aktivitetet e tyre.

Marrë nga Corriere della Serra