web counter
LEXO PA REKLAMA!

SHKARKO APP

App Store
Google Play

E fundit!

x

Anulohet vizita e ministrit të Jashtëm rus në Serbi

6 Qershor 2022, 15:45, Kosova & Bota CNA
Anulohet vizita e ministrit të Jashtëm rus në Serbi
Ministri i Jashtëm rus Sergey Lavrov

Presidenti i Serbisë, Aleksandar Vuçiç, konfirmoi të hënën se është anuluar vizita e ministrit të Jashtëm rus Sergey Lavrov, në Serbi. Ai shkroi në rrjetet sociale se është informuar nga ambasadori rus në Beograd për “shkaqet që çuan në anulimin e vizitës”, ndërsa paralajmëroi se të hënën në mbrëmje do t’i drejtohet opinionit rreth kësaj çështjeje.

Një natë më parë burime në ministrinë e Jashtme ruse u thanë medieve se vendet përreth Serbisë, Bullgaria, Maqedonia e Veriut dhe Mali i Zi, kishin mbyllur hapësirën e tyre ajrore për avionin me të cilin shefi i diplomacisë ruse do të udhëtonte për në Beograd të hënën.

Ministri Lavrov e përshkroi si "të pashembullt” veprimin e këtyre vendeve, ndërsa tha se ende nuk ka marrë një shpjegim për vendimin e tyre.

Në një konferencë me gazetarë ai tha se do ta ftojë ministrin e Jashtëm serb që ta vizitojë Moskën, duke theksuar se “kryesore është se askush nuk do të jetë në gjendje të shkatërrojë marrëdhëniet tona me Serbinë".

Të premten ministria e Jashtme ruse paralajmëroi se ministri Lavrov do të qëndrojë në Beograd me 6 dhe 7 qershor. Paralajmërimi pasoi dakordimin e presidentit serb, Aleksandar Vuçiç me presidentin rus Vladimir Putin, për një kontratë të re trevjeçare për furnizimin me gaz nga Rusia. Presidenti serb thotë se synon anëtarësimin e vendit të tij në Bashkimin Evropian, por me vite ka punuar për forcimin e lidhjeve me Rusinë.

Serbia, ka refuzuar deri tani t’u bashkohet sanksioneve perëndimore kundër Moskës për shkak të agresionit të saj në Ukrainë./ VOA





Lajmet e fundit nga